ღარიბაშვილი: გვინდა, რომ ეს ომი რაც შეიძლება მალე დასრულდეს და მშვიდობა აღდგეს

დღეს, 24 თებერვალს უკვე 1 წელი გავიდა მას შემდეგ, რაც უკრაინაში ეს დამანგრეველი ომი დაიწყო. ყოვლად გაუმართლებელია ის ომი, რომელიც რუსეთმა წამოიწყო. იცით, რომ ომის დაწყების პირველივე დღეებიდან ქართველი ხალხი უკრაინელ ხალხს გვერდში უდგას. ჩვენ საქართველოში ათასობით უკრაინელს ვუმასპინძლეთ და ჩვენს უკრაინელ დებსა და ძმებს მაქსიმალური მხარდაჭერა აღმოვუჩინეთ. ასევე, იცით, რომ ჩვენ გაეროს რეზოლუციის თანასპონსორი ვიყავით. გარდა ამისა, ჩემი დავალებით, საქართველოს საგარეო საქმეთა მინისტრი ახლა ნიუ იორკში იმყოფება, სადაც თავად მიიღო მონაწილეობა გაეროს ასამბლეის ფარგლებში გამართულ ღონისძიებაში, რომელიც უკრაინის ომის წლისთავს მიეძღვნა. ჩვენ ჩვენი სოლიდარობა კიდევ ერთხელ გამოვხატეთ და პოზიცია დავაფიქსირეთ. ჩვენ უკრაინის ტერიტორიულ მთლიანობასა და სუვერენიტეტს მხარს ვუჭერთ. გვინდა, რომ ეს ომი რაც შეიძლება მალე დასრულდეს და მშვიდობა აღდგეს. ეს ჩვენი მთავარი გზავნილია. ასევე, მინდა, გითხრათ, რომ ბოლო 1 წელში ჩვენ უკრაინელ ხალხს ყველა პლატფორმაზე მხარდაჭერა გამოვუცხადეთ.