ეუთოს განცხადებით, აღმოსავლეთ უკრაინაში გამაგრებულ მათ სადამკვირვებლო მისიას ოკუპირებული ლუგანსკის ოლქის თვითგამოცხადებული სახალხო რესპუბლიკის მილიცია დაემუქრა და შეურაცხყოფა მიაყენა.
ეუთოს განცხადებით, მათ სადამკვირვებლო ჯგუფთან ადგილობრივი ე.წ მილიციის წარმომადგენელი ორი შეიარაღებული პირი მივიდა, როდესაც ისინი გამყოფი ხაზის სიახლოვეს სამეთვალყურეო დრონის აფრენას ცდილობდნენ.
"დამკვირვებლებმა ასევე დაინახეს მესამე პირიც, რომელსაც ეცვა ფორმა მხარზე რუსეთის ფედერაციის დროშის მისაკერებლით. შეიარაღებული მილიციელები უყვიროდნენ ჩვენს დამკვირვებლებს და სამეთვალყურეო დრონის განადგურებით იმუქრებოდნენ. ერთ-ერთ ლოკაციაზე კი ერთ-ერთმა სეპარატისტმა იარაღი გადატენა, მეორემ კი ძალით წაართვა დამკვირვებლებს სამეთვალყურეო დრონის სამართავი". – წერს ეუთო.
ორგანიზაციის ცნობით, დრონი დაიკარგა.
რუსეთი უკრაინაში მორიგი სრულმასშტაბიანი შეჭრისთვის ემზადება – ასეთია აშშ-სა და ევროპის ქვეყნების დაზვერვის ინფორმაცია. 23 თებერვლის ღამით, ოკუპირებული დონეცკისა და ლუგანსკის თვითგამოცხადებული რესპუბლიკების მარიონეტმა ხელმძღვანელებმა ვლადიმირ პუტინს უკრაინის წინააღმდეგ სამხედრო დახმარების თხოვნით მიმართეს.
უკრაინამ გაეროს უშიშროების საბჭოს საგანგებო შეხვედრის დანიშვნა მოითხოვა, რომელიც თბილისის დროით 06:30 საათზე დაიწყება.
21 თებერვალს რუსეთის ფედერაციის პრეზიდენტმა, ვლადიმირ პუტინმა აღიარა უკრაინის ოკუპირებული ტერიტორიების, ე.წ. დონეცკისა და ლუგანსკის სახალხო რესპუბლიკების დამოუკიდებლობა. მოგვიანებით პუტინმა რუსეთის შეიარაღებულ ძალებს უკრაინის ოკუპირებულ ტერიტორიებზე, ე.წ. დონეცკისა და ლუგანსკის სახალხო რესპუბლიკებში მშვიდობის უზრუნველყოფის ბრძანება მისცა. ბრძანება გამომდინარეობს ოკუპირებულ ტერიტორიებთან გაფორმებული ხელშეკრულებებიდან, რომელთა მიხედვით, რუსეთის შეიარაღებულმა ძალებმა დონბასში მშვიდობა უნდა უზრუნველყონ.
რუსეთის მიერ უკრაინის ოკუპირებული ტერიტორიების, დონეცკისა და ლუგანსკის ე.წ სახალხო რესპუბლიკების აღიარების შემდეგ ამერიკის შეერთებულმა შტატებმა რუსეთს ახალი სანქციები დაუწესა. პრეზიდენტის, ჯო ბაიდენის თქმით, სანქციები დაუწესეს ორ ყველაზე დიდ ფინანსურ ინსტიტუციას – VEB-ს და სამხედრო ბანკს. ასევე, "ყოვლისმომცველი სანქციები" დაწესდა რუსეთის სუვერენულ ვალზე.
22 თებერვალს აშშ-ს გარდა რუსეთს სანქციები დაუწესა დიდმა ბრიტანეთმა და ევროკავშირმაც. ევროკავშირის სანქციები რუსეთის დუმის 351 დეპუტატს, 27 ფიზიკურ და იურიდიულ პირს შეეხო, დიდი ბრიტანეთის კი 5 ბანკს და სამ მილიარდერს. გერმანია კი ჩრდილოეთის ნაკადი 2-ის მილსადენის ამოქმედებას აჩერებს. რუსეთს სანქციებს უწესებს იაპონია და კანადაც.
უკრაინის საზღვრებთან 100 000-ზე მეტი რუსი სამხედროს განლაგებისა და თავდასხმის საფრთხის ფონზე, დონბასში სიტუაცია 17 თებერვლიდან დაიძაბა. პრორუსი სეპარატისტული ძალები პროვოკაციებს განაგრძობენ. მათი მხრიდან სროლები გრძელდება, რასაც ამ დრომდე 2 უკრაინელის სიცოცხლე ემსხვერპლა. პარალელურად გააქტიურებულია რუსული სამთავრობო მედიების პროპაგანდა და მოვლენებთან დაკავშირებით დეზინფორმაციას ავრცელებენ. მარიონეტულმა სეპარატისტულმა დონეცკისა და ლუგანსკის ე.წ. რესპუბლიკებმა მასობრივი ევაკუაცია გამოაცხადეს.
18 თებერვალს ამერიკის შეერთებული შტატების პრეზიდენტმა, ჯო ბაიდენმა თქვა, რომ რუსეთის სამხედრო ძალები უკრაინაში მომდევნო დღეებში შეიჭრებიან და სამიზნე ქვეყნის დედაქალაქი, კიევი იქნება. დონბასში არსებული დაძაბულობის ფონზე, ბელარუსი-რუსეთის ერთობლივი წვრთნები, რომლებიც 20 თებერვალს უნდა დაწყებულიყო, უვადოდ გახანგრძლივდა.
