ევროპულმა მედიკამენტების სააგენტომ (EMA) Covid-19-ის საწინააღმდეგო NOVAVAX-ის ვაქცინა ევროკავშირში გამოყენებისთვის დაამტკიცა.
ვაქცინა სახელად Nuvaxovid-ი ევროკავშირში დამტკიცებული რიგით მეხუთე ვაქცინაა. ამ დრომდე ავტორიზაცია მიღებული ჰქონდა Pfizer/BioNTech-ის, AstraZeneca/Oxford-ის, Moderna-ს და Jonson&Jonson-ის ვაქცინებს.
Nuvaxovid-ი Pfizer-ის და Moderna-ს რნმ შემუშავებულ ვაქცინებთან შედარებით უფრო ტრადიციული მეთოდით არის დამზადებული. მისი შექმნის ტექნოლოგია B ჰეპატიტის და ყივანახველას ვაქცინის დამზადების ტექნოლოგიის მსგავსია. ასევე Novavax-ის ვაქცინას Pfizer-ის და Moderna-ს ვაქცინებისგან განსხვავებით ძალიან დაბალ ტემპერატურაზე შენახვა არ სჭირდება.
ეგრეთ წოდებული "ცილის სუბერთეულის ვაქცინა" შეიცავს პათოგენის იზოლირებულ ფრაგმენტებს, რომლებიც ადამიანის ორგანიზმში იმუნური სისტემის რეაქციას იწვევს.
სრულად ვაქცინირებისთვის Novavax-ის ვაქცინის ორი დოზაა საჭირო.
ივნისში გამოქვეყნებული კლინიკური კვლევების შედეგებით, Novavax-ი 90.4%-ით ეფექტიანია Covid-19-ის წინააღმდეგ, ხოლო დაავადებით გამოწვეული გართულებებისგან ვაქცინა 100%-ით იცავს. კომპანიის თანახმად, ის მუშაობს ახალი შტამის, ომიკრონის წინააღმდეგ ვაქცინის ეფექტიანობის შემოწმებასა და ამ შტამისთვის სპეციფიკური ვაქცინის ვარიანტის შემუშავებაზე.
ევროკომისიამ უკვე მოაწერა ხელი კონტრაქტს Novavax-თან 200 მილიონი დოზის შესაძენად.
ვაქცინისთვის ავტორიზაციის მოპოვებისთვის Novavax-მა ასევე მიმართა დიდ ბრიტანეთს, ავსტრალიას, ახალ ზელანდიას, კანადას და ჯანდაცვის მსოფლიო ორგანიზაციას. ჯანმომ Novavax-ის ვაქცინა გადაუდებელი გამოყენებისთვის გასულ კვირას დაამტკიცა. Novavax-ის ვაქცინა დამტკიცებულია ინდონეზიასა და ფილიპინებში.