ნამახვანჰესის საწინააღმდეგო პროტესტის ერთ-ერთი ორგანიზატორი, ვარლამ გოლეთიანი ამბობს, რომ აქციის მონაწილეები დღეს, რესპუბლიკის მოედანზე კარვებს გაშლიან.
მისი თქმით, ხელისუფლების მხრიდან ნების გამოხატვას ისინი 24 მაისის 12:00 საათამდე დაელოდებიან.
"ხელისუფლებას დიდი იმედი აქვს იმისა, რომ ეს პროტესტი არის მუხტზე დამყარებული პროტესტი, რომელიც აუცილებლად განიმუხტება რაღაც პერიოდში და ჩვენ სწორედ ამაზე გვითქვამს და არაერთხელ გაგვიმახვილებია ყურადღება, რომ ჩვენი ძლიერი მხარე სწორედ ესაა, რომ ჩვენ არ ვიღლებით ამ ბრძოლაში და ამას რამდენი დღეც არ უნდა დასჭირდეს, ამ ბრძოლას აუცილებლად მივიყვანთ ბოლომდე ისევე სუფთად, როგორც მოვყვებით დღევანდელ დღემდე. ვერ მოახერხებს ვერავინ ამ არგუმენტირებული და სამართლიანი პროტესტის დისკრედიტაციას, რაც არ უნდა Facebook პოსტები დაასპონსოროს ან ზოგადად სატელევიზიო და სარედაქციო პოლიტიკამ გააშავოს ჩვენი მოძრაობა და ბრძოლა. ამიტომ აქ და ამ ნაწილში პასუხისმგებლები ვართ თითოეული ჩვენთაგანი და დაზღვევა იმისა, რომ არ გადაგვძლიოს მეორე მხარემ, ამას სჭირდება ჩვენი სიმრავლე. დღეს ეს მოედანი დაიფარება კარვებით. აქ ვრჩებით. ხვალ თორმეტამდე ველოდებით ნების გამოხატვას ხელისუფლების მხრიდან, რომ სრულდება ყველა ის მოთხოვნა, რომელიც დავაყენეთ". – ამბობს გოლეთიანი.
რესპუბლიკის მოედანზე ნამახვანჰესის მშენებლობის საწინააღმდეგო აქცია იმართება. პროტესტის ერთ-ერთმა ორგანიზატორმა, ვარლამ გოლეთიანმა მთავარი მოთხოვნები წამოაყენა, მათ შორის ეკონომიკის მინისტრის, ნათია თურნავას თანამდებობიდან გადადგომა და მისი პასუხისმგებლობის საკითხის დაყენება:
- კომპანია ენკამ უნდა დატოვოს რიონის ხეობა და გაწყდეს ხელშეკრულება საქართველოს მთავრობასა და კომპანია შორის მდინარე რიონზე დაგეგმილი ნამოხვანის ჰესების კასკადის მშენებლობის შესახებ. გაწყდეს ყველა ხელშეკრულება, რომელიც კომპანია ენკაზე ნამოხავნჰესთან დაკავშირებით 2015 წლის შემდეგ დაიდო.
- გამოცხადდეს მორატორიუმი, რათა მოსახლეობის აზრი ენერგოსექტორის განვითარებასთან დაკავშირებით იყოს გათვალისწინებული. გოლეთიანის განმარტებით, მორატორიუმი საჭიროა, რათა შესაძლებელი იყოს საერთაშორისო პრაქტიკის და მოსახლეობის აზრის გათვალისწინება ენერგოპოლიტიკასთან დაკავშირებით.
- აღიძრას საქმე ყველა იმ პირზე, რომელიც ჩართული იყო დოკუმენტაციის მომზადების პროცესში.
- გადადგეს ეკონომიკის მინისტრი ნათია თურნავა და დადგეს მისი პასუხისმგებლობის საკითხი ნამახავნჰესის პროექტთან დაკავშირებული ხელშეკრულების გაფორმებისთვის
რიონის ხეობაში ადგილობრივი მოსახლეობა და სამოქალაქო აქტივისტები ნამახვანჰესის მშენებლობას უკვე რამდენიმე თვეა, უწყვეტად აპროტესტებენ. 23 მაისს პროტესტმა თბილისში გადაინაცვლა.
16 აპრილს გაიმართა შეხვედრა ნამახვანჰესის მშენებლობის მოწინააღმდეგეთა აქციის ორგანიზატორებსა და ხელისუფლების წარმომადგენლებს შორის. ბარიკადების აღება, მოსამზადებელი სამუშაოების შეწყვეტა და კარვებით პროტესტის გაგრძელება – ეს ის პირობები იყო, რომლებიც აქტივისტებმა ხელისუფლების წარმომადგენლებთან დააყენეს და რომელთა შესრულების შემთხვევაშიც მხარეებს შორის კონსტრუქციული დიალოგი დაიწყებოდა.
საქართველოს მთავრობის ინიციატივით, კომპანია ენკამ უკვე გამოთქვა მზადყოფნა, ნამახვანჰესის პროექტის არსებული კვლევები გადასცეს ექსპერტთა საბჭოს, რომელიც სპეციალურად შეიქმნა კვლევების ხელახლა გადახედვისა და განხილვის მიზნით. ეკონომიკის მინისტრის, ნათია თურნავას თქმით, კვლევების გადახევდა 2021 წლის ივნისამდე უნდა დასრულდეს.
საქართველოს მთავრობის თანახმად, კაშხლის მშენებლობაზე 9-12 თვით მორატორიუმი გამოცხადდა, ვიდრე არ მოხდება გარემოსდაცვითი, გეოლოგიური და სეისმოლოგიური კვლევების ვალიდაცია და ხელახალი დასაბუთება. ამ ეტაპზე მხოლოდ წინამოსამზადებელი სამუშაოები მიმდინარეობს.
არასამთავრობო სექტორთან დიალოგის პროცესში უკვე ჩაერთო ევროკავშირის ენერგეტიკული გაერთიანების დავების გადაწყვეტისა და მოლაპარაკების ცენტრი.
