დაძაბულობა უკრაინის საზღვრებთან

რუსეთი უკრაინაზე: ფეთქებადსაშიში რეგიონია

9 აპრილს კრემლის სპიკერმა, დმიტრი პესკოვმა, ვლადიმირ პუტინისა და გერმანიის კანცლერი ანგელა მერკელის სატელეფონო საუბარსა და რუსეთის ჯარის გადაადგილების მიზეზებზე ისაუბრა.

"პრეზიდენტმა ყველაფერი გასაგებად განმარტა... ჩვენ ჩვენი ძალებისა და ნებისმიერი შენაერთის სურვილისამებრ გადაადგილება შეგვიძლია საკუთარ რუსულ ტერიტორიაზე, ეს ერთი. მეორეც, ფაქტია, რომ ამჟამად უკრაინა, სამწუხაროდ, კვლავ არასტაბილურობისკენ მიისწრაფის. რა თქმა უნდა, ნებისმიერი ქვეყანა, რომელსაც არასტაბილური, საშიში, ფეთქებადსაშიში რეგიონი ესაზღვრება, საკუთარი უსაფრთხოებისთვის აუცილებელ ზომებს მიიღებს" - თქვა პესკოვმა პუტინისა და მერკელის საუბრის შესახებ.

"კრემლში ეშინიათ, რომ უკრაინაში სამოქალაქო ომი განახლდება. თუკი ჩვენს საზღვრებთან სამოქალაქო ომი, ფართომასშტაბური საბრძოლო მოქმედებები დაიწყება, ეს რუსეთის ფედერაციის უსაფრთხოებას ხელს შეუშლის" - დაამატა პესკოვმა. 

პესკოვმა ასევე ისაუბრა მსგავსი სცენარის განვითარების შემთხვევაში რუსეთის ჩართულობის შესახებ და ახსენა სრებრენიცას ჟლეტვა, როდესაც, 1995 წელს, სერბულმა სამხედრო დაჯგუფებებმა ბოსნიელებს ეთნიკური წმენდვა და გენოციდი მოუწყვეს. პესკოვი აგრესორობაში უკრაინულ მხარეს ადანაშაულებს და თვლის, რომ პრობლემის გადაწყვეტა მათ ძალით სურთ.

"როგორც სხავდასხვა განცხადებებიდან ჩანს, უკრაინული მხარე სამხრეთ-აღმოსავლეთთან [დონბასი და ყირიმი] საკუთარი პრობლემის ძალით გადაწყვეტის აზრს ბოლომდე არ ივიწყებს. საბრძოლო მოქმედებების დაწყებისა და იქ [უკრაინაში] ისეთი ჰუმანიტარული კატასტროფის დატრიალების შემთხვევაში, როგორიც სრებრენიცაში იყო, მსოფლიოში არც ერთი ქვეყანა განზე არ გადგება. ყველა ქვეყანა, რუსეთის ჩათვლით, მიიღებს ზომებს, რათა მსგავსი ტრაგედიები აღარ დატრიალდეს" - თქვა კრემლის სპიკერმა.

პესკოვის სიტყვებს, იმის შესახებ, რომ უკრაინა საკუთარი პრობლემის ძალით გადაჭრის აზრს არ ივიწყებს და კიევის მხარის დონბასზე თავდასხმისთვის მზადების დადანაშაულებას, უკრაინის შეიარაღებული ძალების მხედართმთავარი რუსლან ხომჩაკი გამოეხმაურა და ფაქტს დეზინფორმაცია უწოდა.


აღმოსავლეთ უკრაინაში მდგომარეობა მარტის ბოლოს დაიძაბა. 26 მარტს სოფელ შუმასთან სეპარატისტების მიერ გახსნილი საარტილერიო ცეცხლით 4 უკრანელი სამხედრო დაიღუპა. ბოლო პერიოდში ეს ერთ დღეში უკრაინაული მხარის ყველაზე დიდი დანაკარგია. უკრაინაში ეუთოს სპეციალური მონიტორინგის მისიის ანგარიშის თანახმად, 2 აპრილს დონბასში ცეცხლის შეწყვეტის შეთანხმების დარღვევის 1 021 შემთხვევა აღირიცხა, მათ შორის 511 აფეთქება. ეუთოს ანგარიშების მიხედვით, ეს ბოლო ერთი თვის მანძილზე აღმოსავლეთ უკრაინაში ცეცხლის შეწყვეტის შეთანხმების დარღვევის ყველაზე მეტი შემთხვევაა. შეთანხმების სისტემატური დარღვევის ფონზე აქტიურად ვრცელდება სხვადასხვა ფოტო- და ვიდეომასალა, რომელშიც ჩანს უკრაინის სეპარატისტული ტერიტორიებისკენ ან ქვეყნის საზღვრებისკენ მიმავალი რუსული სამხედრო ტექნიკის ეშელონები და  ჯავშანტექნიკის კოლონები.

უკრაინის შეაიარაღებული ძალების მთავარსარდლის, რუსლან ხომჩაკის თქმით, რუსეთი უკრაინის აღმოსავლეთ ნაწილში, რუსეთ-უკრაინის საზღვრისკენ, ბრიანსკის, ვორონეჟის რეგიონებში და ანექსირებულ ყირიმში დამატებით ბატალიონებს, ტაქტიკურ ჯგუფებს გზავნის. ხომჩაკი ამბობს, რომ სამხედრო აქტივობას რუსეთი წვრთნების, “დასავლეთი 2021”-სთვის მზადებით ამართლებს. მთავარსარდლის თქმით, ქვეყნის აღმოსავლეთ საზღვრებთან 28 ტაქტიკური ჯგუფია განლაგებული და უკრაინის სამხედრო ძალების შეფასებით, რუსეთი გეგმავს საზღვართან დამატებით 25 ბატალიონის გადასროლას.

კრემლის სპიკერმა დმიტრი პესკოვმა ფაქტობრივად დაადასტურა უკრაინის საზღვრებთან რუსული სამხედრო ძალების მობილიზება. პესკოვის თქმით, "რუსეთი თავისი შეხედულებისამებრ განსაზღვრავს სამხედრო ძალების გადაადგილებას თავისი ტერიტორიის ფარგლებში, ეს არავის უნდა აწუხებდეს და არავისთვის საფრთხეს არ წარმოადგენს". პესკოვმა ასევე აღნიშნა, რომ რუსულ სამხედრო ძალებს "არასოდეს არ მიუღიათ და არ იღებენ მონაწილეობას" დონბასის კონფლიქტში. მისი თქმით, კრემლს არ სურს, რომ "ომი კვლავ გააქტიურდეს უკრაინის პროვოკაციების შედეგად". პესკოვმა ასევე გამოთქვა შიში, რომ "უკრაინული მხარე შეიძლება წავიდეს პროვოკაციებზე, რომელიც ომამდე მიიყვანს საქმეს.

5 აპრილს სატელეფონო საუბარი შედგა უკრაინის პრეზიდენტს, ვოლოდიმირ ზელენსკის და ნატოს გენერალურ მდივანს, იენს სტოლტენბერგს შორის. სტოლტენბერგმა კიდევ ერთხელ დაადასტურა უკრაინის სუვერენიტეტის და ტერიტორიული მთლიანობის მხარდაჭერა, ხოლო ზელენსკიმ აღნიშნა, რომ დონბასში ომის დასრულების ერთადერთი გზა ნატოა.

დაძაბულობის ფონზე ბაიდენის ადმინისტრაციასა და უკრაინის მთავრობის წევრებს შორის აქტიური სატელეფონო კომუნიკაცია გაიმართა.  2 აპრილს აშშ-ს პრეზიდენტმა ჯო ბაიდენმა და უკრაინის პრეზიდენტმა, ვოლოდიმირ ზელენსკიმ ისაუბრეს. ეს მათი პირველი სატელეფონო საუბარი იყო. ბაიდენმა კიდევ ერთხელ დაადასტურა შეერთებული შტატების ურყევი მხარდაჭერა უკრაინის ტერიტორიული მთლიანობისადმი დონბასსა და ყირიმში მიმდინარე აგრესიის ფონზე. სატელეფონო საუბრები  გაიმართა აშშ-ს თავდაცვის მდივანს, ლოიდ ოსტინსა და უკრაინის თავდაცვის მინისტრ ანდრეი ტარანს შორისაც. ოსტინმა დაგმო რუსეთის აგრესია და პროვოკაციული ქმედებები. სატელეფონო საუბარი შედგა აშშ-ს სახელმწიფო მდივანს ენტონი ბლინკენსა და უკრაინის საგარეო საქმეთა მინისტრ დმიტრო კულებას შორისაც. ყველა ოფიციალურ საუბარში აშშ თავის აქტიურ მხარდაჭერას უდასტურებს უკრაინას.

კომენტარები