2020 წელს რუსი ჰაკერების მიერ აშშ-ის სამთავრობო სააგენტოებსა და კერძო კომპანიებზე განხორციელებული SolarWinds-ის ჰაკერული თავდასხმის დროს სამიზნეთა შორის NASA და FAA ყოფილან.
სადაზვერვო სააგენტოების ინფორმაციით, ჰაკერული შეტევა რამდენიმე თვის განმავლობაში მიმდინარეობდა და შეეხო ისეთ სამთავრობო სააგენტოებს, როგორებიცაა: აშშ-ის შინაგანი უსაფრთხოების დეპარტამენტი, სახელმწიფო დეპარტამენტი, ვაჭრობის დეპარტამენტი, სახაზინო დეპარტამენტი და, ახლა როგორც ირკვევა, ფედერალური საავიაციო ადმინისტრაცია [FAA] და NASA.
კიბერშეტევასთან დაკავშირებით გამოძიება ამჟამადაც მიმდინარეობს და, ჯერჯერობით უცნობია, ზუსტად რა რაოდენობის სენსიტიურ ინფორმაციასთან ჰქონდათ ჰაკერებს წვდომა.
NASA-სა და FAA-ის წარმომადგენლებმა საკითხთან დაკავშირებით კომენტარისაგან თავი შეიკავეს.
ჰაკერების უშუალო სამიზნე კომპანია SolarWinds-ის პროგრამა, Orion-ი იყო, რომელსაც ათასობით ამერიკული კომპანია და სამთავრობო სააგენტო იყენებს. კიბერშეტევა სწორედ SloarWinds-ის საშუალებით განხორციელდა და ის რამდენიმე თვის განმავლობაში შეუმჩნეველი იყო, სანამ გარღვევა კომპანია FireEye-მ არ აღმოაჩინა.
ექსპერტების თქმით, კიბერშპიონაჟის საშუალებით ჰაკერებმა დიდი რაოდენობის სენსიტიური და საიდუმლო ინფორმაცია მოიპოვეს.
