აშშ-ს სენატმა აშშ-ს პრეზიდენტის, ჯო ბაიდენის მიერ თავდაცვის მდივნის პოსტზე წარდგენილი გადამდგარი გენერალი, ლოიდ ოსტინი დაამტკიცა.
67 წლის ოსტინი პირველი აფროამერიკელია, ვინც პენტაგონს უხელმძღვანელებს.
მას მხარს უჭერს 93 სენატორი, 2-მა მის წინააღმდეგ მისცა ხმა.
იმისათვის, რომ თავდაცვის მდივნად დაემტკიცებინათ, ოსტინს კონგრესის მიერ ერთ-ერთი წინაპირობის მოხსნა სჭირდებოდა. გენერლის პოსტიდან ის 2016 წელს გადადგა, ხოლო იმისათვის, რომ პირი პენტაგონს ჩაუდგეს სათავეში, საჭიროა, აქტიური სამხედრო სამსახურიდან სულ მცირე 7 წელი იყოს გასული. ამ დრომდე მსგავსი გამონაკლისი კონგრესმა სულ 2 შემთხვევაში დაუშვა - უკანასკნელი ასეთი შემთხვევა მოხდა ტრამპის მიერ გენერალ ჯეიმზ მეტისის დანიშვნის დროს.
გენერალ ლოიდ ოსტინს 4 ვარსკვლავი აქვს მიღებული, ის 2013-2016 წლებში ახლო აღმოსავლეთის, ცენტრალური აზიისა და სამხრეთ აზიის რეგიონებზე მუშაობდა და იყო წამყვანი ფიგურა ერაყსა და სირიაში ე.წ. ისლამური სახელმწიფოს წინააღმდეგ აშშ-ს კამპანიაში.
სენატში ლოიდ ოსტინის მოსმენის დროს მან მრავალ საკითხზე, მათ შორის საგარეო საკითხებზე - ჩინეთის, რუსეთის, ირანის საფრთხეებზე და ასევე, ალიანსების მნიშვნელობაზე ისაუბრა.
ჩინეთისა და რუსეთის საფრთხეებზე საუბრისას, ოსტინმა განმარტა, თუ რატომ განიხილავს ჩინეთს ყველაზე მნიშვნელოვან საფრთხედ:
"ჩინეთი წარმოადგენს ყველაზე მნიშვნელოვან საფრთხეს, რადგან ჩინეთი აღმავალია, რუსეთიც საფრთხეა, მაგრამ ის ვარდნაშია, რუსეთს კვლავ შეუძლია დიდი ზიანის მოყენება, როგორც ჩვენ ეს ვნახეთ უკანასკნელ დღეებში - ესაა ქვეყანა, რომელზეც უნდა გვქონდეს გარკვეული ფოკუსი, თუმცა ჩინეთი ზრდადი საფრთხეა".
20 იანვარს სენატმა აშშ-ს პრეზიდენტის, ჯო ბაიდენის მიერ ეროვნული დაზვერვის დირექტორის პოსტზე წარდგენილი ავრილ ჰეინსი დაამტკიცა. ის არის პირველი ქალი, რომელიც ამ თანამდებობას დაიკავებს.
