ეროვნულ-დემოკრატიული ინსტიტუტის მარტის კვლევის მიხედვით, ქართული ოცნების მომხრეთა 29% თვლის, რომ რუსეთი საქართველოსთვის არანაირ საფრთხეს არ წარმოადგენს. ამ მოსაზრებას ნაციონალური მოძრაობის მხარდამჭერთა 12% იზიარებს.
ქართული ოცნების მომხრეთა 47% თვლის, რომ რუსეთი საფრთხეს წარმოადგენს, თუმცა ეს საფრთხე გაზვიადებულია, მაშინ როცა ამ მოსაზრებას ნაციონალური მოძრაობის მხარდამჭერთა 21% იზიარებს. იმ ადამიანთა უმრავლესობა (57%), რომელიც ფიქრობს, რომ მის შეხედულებებთან ყველაზე ახლოს ნაციონალური მოძრაობა დგას, თვლის, რომ რუსეთი რეალური და არსებული საფრთხეა. ამ მოსაზრებას ქართული ოცნების ღირებულებებთან ახლოს მყოფი მოსახლეობის 17% იზიარებს.
იმ ადამიანთა უმრავლესობა (40%), რომლებიც აცხადებენ, რომ მათ შეხედულებებთან ახლოს არცერთი პარტია არ დგას, თვლის, რომ რუსეთი საფრთხეს წარმოადგენს, თუმცა ეს საფრთხე გაზვიადებულია. ამ ადამიანთა 28% კი მიიჩნევს, რომ რუსეთი რეალური და არსებული საფრთხეა, ხოლო 20% რუსეთში საფრთხეს ვერ ხედავს.
კვლევა ქვეყნის მასშტაბით, 13-27 მარტის პერიოდში ჩატარდა და მის ფარგლებში შემთხვევითი შერჩევით 3,103 ადამიანი გამოიკითხა. კვლევის ცდომილება 2.5%-ს შეადგენდა. იგი კავკასიის კვლევითი რესურსების ცენტრმა ჩაატარა და შვედეთის განვითარების ფონდის მიერ არის დაფინანსებული. წინა კვლევა არასამთავრობო ორგანიზაციამ 2012 წლის ნოემბერში წარმოადგინა.
