CNN-ის ინფორმაციით, აშშ-ს პრეზიდენტმა დონალდ ტრამპმა ყოფილ ვიცეპრეზიდენტ კამალა ჰარისს ჯო ბაიდენის მიერ კანონით განსაზღვრული ვადის მიღმა გახანგრძლივებული საიდუმლო სამსახურის დაცვა გაუუქმა.
ცნობისთვის, აშშ-ს ყოფილ პრეზიდენტებს საიდუმლო სამსახურის დაცვა ცხოვრების ბოლომდე აქვთ. ხოლო ჰარისს, რომელიც 2024 წლის საპრეზიდენტო არჩევნებზე ტრამპის მეტოქე იყო, ფედერალური კანონით, დაცვა თანამდებობის დატოვებიდან ექვი თვის განმავლობაში უნდა ჰქონოდა. ეს პერიოდი 21 ივლისს ამოიწურა, თუმცა, თეთრი სახლის დატოვებამდე პრეზიდენტმა ჯო ბაიდენმა ჰარისს დაცვა დამატებით ერთი წლით გაუხანგრძლივა.
სწორედ ეს ბრძანება გააუქმა ტრამპმა 28 აგვისტოთი დათარიღებულ თავის წერილში, რომლის ასლიც CNN-მა მოიპოვა.
"გეძლევათ უფლებამოსილება, 1-ელი სექტემბრიდან შეწყვიტოთ კანონით გათვალისწინებული პროცედურების გარდა უსაფრთხოებასთან დაკავშირებული ყველა პროცედურა, რომელზე უფლებამოსილებაც აქამდე აღმასრულებელი მემორანდუმით იყო მონიჭებული, შემდეგი პირის მიმართ: ყოფილი ვიცეპრეზიდენტი კამალა დ. ჰარისი." - წერია ტრამპის წერილში.
ჰარისის მრჩეველმა CNN-ს უთხრა, რომ "ვიცეპრეზიდენტი მადლობელია აშშ-ს საიდუმლო სამსახურის მათი პროფესიონალიზმის, თავდადებისა და უსაფრთხოებისადმი ურყევი ერთგულებისთვის."
