აშშ-ს სავაჭრო პოლიტიკის საპასუხოდ, კანადა 25%-იან საბაჟო გადასახადს აწესებს იმ ავტომობილებზე, რომლებიც აშშ-დან თავისუფალი ვაჭრობის ზონის გარეთ შემოაქვთ.
ამასთან დაკავშირებით კანადის პრემიერმინისტრმა, მარკ კარნიმ 3 აპრილს ოტავაში გამართულ პრესკონფერენციაზე ისაუბრა.
კანადის პრემიერ-მინისტრის თქმით, ტარიფები იმ ავტომობილებზე გავრცელდება, რომელთა იმპორტირებაც თავისუფალი ვაჭრობის შეთანხმების ფარგლებს გარეთ ხდება და ასევე ასევე არაკანადური წარმოშობის ავტონაწილებზე, რომლებიც CUSMA-ს მოთხოვნებს აკმაყოფილებს.
ამავე დროს, ოტავას ტარიფები მექსიკაზე, CUSMA-ს წევრ მესამე ქვეყანაზე, არ გავრცელდება.
"დასრულდა ჩვენი ძველი ურთიერთობა, რომელიც შეერთებულ შტატებთან მუდმივ ინტეგრაციას გულისხმობდა. 80-წლიანი პერიოდი, როდესაც ამერიკამ თავის თავზე გლობალური ეკონომიკური ლიდერის როლი აიღო, დასრულდა" - თქვა კანადის პრემიერმინისტრმა.
კანადის მთავრობის ხელმძღვანელმა ასევე თქვა, რომ მისი აზრით, აშშ-ს ადმინისტრაცია, სავარაუდოდ, ამჟამინდელ სავაჭრო პოლიტიკას არ შეცვლის მანამ, სანამ ნათელი არ გახდება, რომ ამ კურსით ამერიკელი ხალხიც ზარალდება.
ამასთან, კანადას არ შეეხო ის 10%-იანი ტარიფები, რომლებიც აშშ-მ მსოფლიოს თითქმის ყველა ქვეყანას დაუწესა.
შეგახსენებთ, რომ 2 აპრილს აშშ-ს პრეზიდენტმა დონალდ ტრამპმა, სულ მცირე, 10%-იანი საბაზისო ტარიფი ყველა ქვეყანას დაუწესა.
ტრამპმა წარადგინა დიაგრამა, სახელწოდებით, ორმხრივი ტარიფები, რომელშიც სხვა ქვეყნების მიერ აშშ-ს მიმართ დაწესებული ტარიფები შედარებულია აშშ-ს ტარიფებთან.
ამასთან, დიაგრამაზე ჩანს, რომ აშშ დიდ ბრიტანეთს 10%-იან, ევროკავშირს კი 20%-იან ტარიფს დაუწესებს.
"ისინი გვახდევინებენ, ჩვენც ვახდევინებთ. როგორ შეიძლება, ვინმე ამაზე გაბრაზდეს". - თქვა ტრამპმა.
