აშშ-ს სახელმწიფო მდივნის, მარკო რუბიოს ცნობით, სალვადორმა აშშ-ს საკუთარ ციხეებში აშშ-დან დეპორტირებული ნებისმიერი ეროვნების "სახიფათო კრიმინალის" მოთავსება შესთავაზა.
რუბიო აშშ-ს სახელმწიფო მდივნის რანგში პირველი ოფიციალური ვიზიტით სამხრეთ ამერიკის ქვეყნებს, მათ შორის, სალვადორს ეწვია.
სალვადორის პრეზიდენტ ნაიიბ ბუკელესთან შეხვედრის შემდეგ რუბიომ განაცხადა, რომ ბუკელე "დათანხმდა მსოფლიოში ყველაზე უპრეცენდენტო საიმიგრაციო შეთანხმებას".
"აშშ-ში [მყოფი] ნებისმიერი არალეგალური მიგრანტისთვის, რომელიც სახიფათო კრიმინალია, მან [ბუკელემ] შემოგვთავაზა ციხეები, რათა გავგზავნოთ [კრიმინალები] და ის მათ ციხეებში ჩასვამს". - განაცხადა რუბიომ.
ამასთან, ბუკელემ რუბიოს შესთავაზა სალვადორის ციხეებში ამერიკის მოქალაქე ან რეზიდენტი სახიფათო კრიმინალების მოთავსება. თუმცა უცნობია, დათანხმდება თუ არა აშშ ამ შეთავაზებას, ვინაიდან ქვეყნიდან აშშ-ს მოქალაქეების დეპორტაცია კანონმდებლობის მიხედვით დასაშვები არ არის.
როგორც Reuters წერს, იმ ძალისხმევასთან ერთად, რომ აშშ-მ მიგრანტები საკუთარ ქვეყნებში დააბრუნოს, რუბიო ასევე ცდილობს შეთანხმების მიღწევას "მესამე ქვეყნებთან", რომლებიც სხვა ეროვნების დეპორტირებულ მიგრანტებს მიიღებენ.
მაგალითისთვის, კუბას და ვენესუელას, რომელთაც აშშ-სთან მწვავე ურთიერთობა აქვთ, შეუზღუდავთ იმ დეპორტირებულ მიგრანტთა რაოდენობა, რომლებსაც მიიღებდნენ. თუმცა, როგორც დონალდ ტრამპმა ცოტა ხნის წინ განაცხადა, ვენესუელას პრეზიდენტი ნიკოლას მადურო დათანხმდა წინადადებას, რომ აშშ-სგან დეპორტირებული ყველა ვენესუელელი მოქალაქე მიიღოს.
