ჰამას-ისრაელის 2023-24 წლის ომი

IDF: ჰამასი საავადმყოფოებს ტერორისტული საქმიანობისთვის იყენებს (VIDEO)

ჰამად ბინ ხალიფა ალ-თანის სახელობის საავადმყოფო
IDF

ისრაელის თავდაცვის ძალების სპიკერმა დანიელ ჰაგარიმ 5 ნოემბერს გამართულ პრესბრიფინგზე მედიას ჰამასის მიერ ისრაელის წინააღმდეგ საავადმყოფოების გამოყენების მტკიცებულებები წარუდგინა.

"ჰამასი სისტემურად იყენებს საავადმყოფოებს, რათა საკუთარი სამხედრო მოქმედებები დამალოს" - ამბობს ჰაგარი.

ჰაგარის თქმით, სამხედრო ოპერაციის ფარგლებში, ისრაელის თავდაცვის ძალებმა გამოააშკარავეს, თუ როგორ იყენებს ჰამასი საკუთარი მიზნებისთვის კატარის დაფინანსებით აშენებულ ჰამად ბინ ხალიფა ალ-თანის სახელობის საავადმყოფოს. ბრიფინგზე გავრცელებულ ვიდეოში საავადმყოფოს სიახლოვეს მდებარე გვირაბის შესასვლელი ჩანს, რომელიც, ჰაგარის თქმით, ჰამასის გვირაბების ქსელს უკავშირდება.

გარდა ამისა, ჰაგარი ამბობს, რომ ჰამასის ტერორისტული დაჯგუფება ისრაელის არმიას საავადმყოფოს ტერიტორიიდან ცეცხლს უხსნის, რაც ვიდეოშიც არის ნაჩვენები. IDF-ის თქმით,  გავრცელებულ სურათებში ასევე საავადმყოფოს მიმდებარედ განლაგებული სარაკეტო გამშვები პუნქტები ჩანს.

ისრაელის თავდაცვის ძალები კიდევ ერთხელ უსვამს ხაზს იმ ფაქტს, რომ ჰამასი მოსახლეობას, ასევე სამოქალაქო დანიშნულების შენობებს, ფარად იყენებს, რათა IDF-ის საჰაერო იერიშები შეზღუდოს.


ღაზის სექტორიდან ისრაელზე მოულოდნელი სახმელეთო და სარაკეტო თავდასხმა 7 ოქტომბერს დაიწყო. ტერორისტები ქვეყნის სამხრეთით მდებარე დასახლებებში შევიდნენ, სადაც სასტიკი დანაშაულები ჩაიდინეს და ხოცვა-ჟლეტა მოაწყვეს. აქ შეტაკებები რამდენიმე დღის განმავლობაში გრძელდებოდა.

რა, სად და როდის შეეშალა ისრაელის დაზვერვას

ტერორისტებმა აიყვანეს 200-მდე მძევალი და ღაზის სექტორში გადაიყვანეს. ისრაელის თავდაცვის ძალებმა იმ კიბუცებში, სადაც ჰამასელები იმყოფებოდნენ, მძიმე სურათები აღმოაჩინეს. ცნობების მიხედვით, იპოვეს დახოცილი, თავმოკვეთილი ბავშვებიც, რაც აშშ-ს პრეზიდენტმა, ჯო ბაიდენმაც დაადასტურა. თავდასხმის პირველ დღეს გავრცელდა ჩანაწერებიც, რომლებშიც ისრაელელი ჯარისკაცების ცხედრების შეურაცხყოფის ფაქტებიც ჩანდა. 7 ოქტომბრის მოვლენებს 1 400-მდე ისრაელელი ემსხვერპლა. დახოცილთა ნაწილის იდენტიფიცირება ჯერ კიდევ მიმდინარეობს.

ისრაელმა სამხრეთის ტერიტორიების ტერორისტებისგან გაწმენდასთან ერთად ღაზის სექტორში ჰამასის ობიექტებზე სარაკეტო იერიშების მიტანა დაიწყო, რაც უკვე რამდენიმე დღე გრძელდება. პარალელურად, დროგამოშვებით, შეტაკებები ისრაელის ჩრდილოეთ საზღვარზეც ხდება. ამ მიმართულებით, ლიბანის სამხრეთ ტერიტორიას აკონტროლებს ირანის მიერ მხარდაჭერილი დაჯგუფება ჰეზბოლა.

საფრთხე, რომელიც ღაზიდან მოდიოდა, განადგურდება – ინტერვიუ საქართველოში ისრაელის ელჩთან

აშშ-ს პრეზიდენტმა, ჯო ბაიდენმა ისრაელის მიმართულებით სამხედრო ავიამზიდი, საბრძოლო ხომალდები და ავიაგამანადგურებლები გააგზავნა. მსგავსი ნაბიჯი გადადგა დიდმა ბრიტანეთმაც.

ისრაელმა ღაზის სექტორი სრულ ბლოკადაში მოაქცია. 13 ოქტომბერს ღაზის ჩრდილოეთში მცხოვრებმა მშვიდობიანმა მოსახლეობამ მიიღო გაფრთხილება, რომ ტერიტორია 24 საათში დაეტოვებინათ. ამავე დღეს, ღაზის სექტორში მცირე მასშტაბის რეიდები მოეწყო. ისრაელი, სავარაუდოდ, მასშტაბური სახმელეთო ოპერაციისთვის ემზადება. მზადყოფნაშია 300 000 რეზერვისტი. აქამდე ისრაელის მაღალჩინოსნები დებდნენ პირობას, რომ ჰამასი განადგურდება და ღაზის სექტორში რეალობა შეიცვლება.

22 ოქტომბერს ღაზის სექტორში ეგვიპტიდან ჰუმანიტარული დახმარება შევიდა. პროცესს ისრაელი აკონტროლებს, რათა მხოლოდ საკვები და სამედიცინო პროდუქტები შეიტანონ. აკრძალულია საწვავის შეტანა.

კომენტარები