კულტურის მინისტრმა, თეა წულუკიანმა თქვა, რომ საქართველოს პრეზიდენტი, სალომე ზურაბიშვილი დიდი ხანია, გაღმაა გასული. საზოგადოებრივი მაუწყებლის ცნობით, წულუკიანმა ასე უპასუხა პრეზიდენტის ადმინისტრაციის ყოფილი თანამშრომლის, პიერ-ალექსანდრე კრევო- ასათიანის შესახებ დასმულ კითხვას, რომელიც ერთიან ნაციონალურ მოძრაობას შეუერთდა და პარტიის საგარეო ურთიერთობების სამსახურის უფროსის მოადგილედ დაინიშნა.
"აღნიშნული იმის მანიშნებელია, რომ ეს ქალბატონი უკვე ძალიან დიდი ხანია, გაღმაა გასული". - თქვა წულუკიანმა საზოგადოებრივი მაუწყებლის ცნობით.
პიერ-ალექსანდრე კრევო-ასათიანმა TV პირველის ეთერში თქვა, რომ მას ჰგონია, სალომე ზურაბიშვილი მიხეილ სააკაშვილს შეიწყალებს. კრევოს თქმით, ის ფიქრობს, რომ ზურაბიშვილი ნელ-ნელა ხედავს, რომ სააკაშვილის შეწყალების საჭიროება დადგება.
პიერ-ალექსანდრე კრევო-ასათიანის ამ განცხადებას პრეზიდენტის ადმინისტრაციამ უპასუხა. ადმინისტრაციაში ამბობენ, რომ ალექსანდრე კრევოს არც უფლება და არც ლეგიტიმაცია არ აქვს, რომ პრეზიდენტის თითქოსდა პოზიციებსა და მოსაზრებებზე ჭორები გაავრცელოს.
