Tbilisi Pride Festival-ის მონაწილემ, ანა სუბელიანმა ფორმულას ეთერში 8 ივლისს მომხდარ მოვლენებთან დაკავშირებით ისაუბრა. მისი თქმით, Tbilisi Pride მომხდართან დაკავშირებით შინაგან საქმეთა სამინისტროსთან სამართლებრივ დავას აპირებს.
"ის, რაც მოხდა გუშინ, იყო აშკარად დაგეგმილი. ეს ბევრი რამით იკვეთება. [იყო] შინაგან საქმეთა სამინისტროსა და ალტ-ინფოს მიერ ერთობლივად დადგმული წინასწარი სპეცოპერაცია. აბსოლუტურად ყველაფერი იყო წინასწარ ჩაფიქრებული. პოლიციელებმა მოაცილეს მოძალადეები, რეალურად არც ისე დიდი რაოდენობა, გამკლავებადი რაოდენობა მოაცილეს ჩვენს კარამდე... მთლიანობაში მგონი ძალიან დიდ ზიანზეა ლაპარაკი, მაგრამ ჯერჯერობით ეს ყველაფერი აღწერილი არ არის. ახლა ვაპირებთ, რომ ეს მაქსიმალურად შევისწავლოთ და შესაბამისი სამართლებრივი ღონისძიებებიც წამოვიწყოთ. ჩვენ აუცილებლად ვიდავებთ ამ საქმეზე. ვიდავებთ შინაგან საქმეთა სამინისტროს წინააღმდეგ". - თქვა ანა სუბელიანმა.
Tbilisi Pride Fest 2023 გუშინ, 8 ივლისს, 17:00-ზე იყო დაგეგმილი. თუმცა, რამდენიმე საათით ადრე ორკ-ქოცები შეიკრიბნენ და ფესტივალისკენ დაიძრნენ. ამის შემდეგ, Tbilisi Pride-მა ინფორმაცია გაავრცელა, რომ მათ ევაკუაცია მოუწიათ. რადგან სამართალდამცველებმა "ვერ შეძლეს ტერიტორიის დაცვა".
- ქოც-ორკებმა დაიკავეს ტერიტორია, დაარბიეს სცენა, ინვენტარის ნაწილი დაწვეს – IPN
- "პოლიცია სადღაც შუა გზაზე გვტოვებდა" – Tbilisi Pride-ის წევრი
შს მინისტრის მოადგილის, ალექსანდრე დარახველიძის მტკიცებით, "ადგილზე მობილიზებული იყო მაქსიმალური რაოდენობა პოლიციის, რაც შეიძლებოდა, ყოფილიყო ამ ლოკაციაზე დაცვისთვის". მისი თქმით, "ყველა აქცია შეუძლებელია, რომ 100%-იანი უსაფრთხოება იყოს უზრუნველყოფილი და მთლიანად იყოს დაცული, განსაკუთრებით ისეთ დროს, როცა გაშლილ ტერიტორიაზეა საუბარი, ამ რისკების თაობაზე მუდმივად ვსაუბრობდით, მოვიდა ძალიან დიდი რაოდენობა კონტრაქციის მონაწილეებისა, ყველაფერი გავაკეთეთ, რომ ყოფილიყო თითოეული ადამიანის სიცოცხლე და ჯანმრთელობა დაცული" - თქვა მინისტრის მოადგილემ.
ალექსანდრე დარახველიძის მტკიცებით, Lisi Wonderland-ის ტერიტორიაზე დილიდან მობილიზებული იყო განსაკუთრებულ დავალებათა დეპარტამენტი, ქალაქ თბილისის პოლიცია, საპატრულო პოლიცია და "ყველა ის დანაყოფი, ვისაც ჰქონდა უფლებამოსილება, განეხორციელებინა თავისი მანდატი".
"თუმცა, თქვენ კარგად ნახეთ, რომ მოვიდა საკმაოდ დიდი რაოდენობა კონტრაქციის მონაწილეების, ჩვენ გვქონდა კორდონები გაკეთებული გზებზე, მაგრამ ეს იყო გაშლილი ტერიტორია, კონტრაქციის მონაწილეებმა მოახერხეს, შემოვლითი გზებით შემოეღწიათ და გაერღვიათ კორდონები პოლიციის, თუმცა, ჩვენ მოვახერხეთ, რომ პრაიდის ღონისძიების ორგანოზატორები და მონაწილეები, ვინც ადგილზე იყვნენ, ისინი უსაფრთხოდ გავიყვანეთ ტერიტორიიდან, არავითარი დაზიანება არ მიუღიათ, ამჟამად პოლიცია ახორციელებს შესაბამის ღონისძიებებს, იმისთვის, რომ მოხდეს სიტუაციის სტაბილიზება და არ მოხდეს რაიმე ტიპის თავდასხმები კონკრეტულ პირებზე" - თქვა მინისტრის მოადგილემ.
