ევროპული საქართველოს ერთ-ერთი ლიდერის, გიორგი კანდელაკის თქმით, საქართველოს გავლით რუსეთში ტვირთები გაედინება. მისივე თქმით, ტრანზაქციები ხორციელდება რუსული სბერბანკის გავლითაც, რაც ნიშნავს, რომ საქართველოს მთავრობა რუსეთს სანქციების თავიდან არიდებაში ეხმარება.
"ქვეყნებმა, რომელთა პორტებითაც რუსეთი სარგებლობდა აქამდე, რუსეთს აუკრძალეს საკუთარი პორტებით სარგებლობა და ამიტომ დასჭირდა საქართველოს პორტების გავლით ამა თუ იმ პროდუქციის შეტანა რუსეთს დღეს. ახლა კითხვა, რომელიც საქართველოს წინაშეა, მარტივია - ეხმარება საქართველო რუსეთს საერთაშორისო სანქციებისთვის თავის არიდებაში თუ საქართველო დგას ცივილიზებულ სამყაროსთან ერთად. დღესდღეობით, რადგან მიმდინარეობს საქართველოს გავლით ტვირთების გადინება, მითუმეტეს ტრანზაქციები ხორციელდება რუსული სბერბანკის გავლით, პასუხი რომელსაც სცემს ამ კითხვაზე საქართველოს მთავრობა არის ის, რომ საქართველოს ეხმარება რუსეთს სანქციებისთვის თავის არიდებაში". – ამბობს გიორგი კანდელაკი.
დღეს, 20 აპრილს, დროას ლიდერმა, ელენე ხოშტარიამ ბრიფინზე თქვა, რომ რუსეთი სხვა ქვეყნებს სთავაზობს, საქართველოში არსებული კომპანიების გზით ფინანსური გადარიცხვები შეასრულოს და სანქციებს თავი აარიდოს.
ხოშტარიამ კონკრეტულ შემთხვევაზე ისაუბრა, რომლის დროსაც რუსეთის საავტორო უფლებების ასოციაციამ (RAO) ერთ-ერთ ესტონურ კომპანიას ჰონორარის გადახდა საქართველოში არსებული კომპანია GERA-ს (საქართველოს საავტორო უფლებამფლობელთა ასოციაცია) გავლით შესთავაზა.
