რუსეთ-უკრაინის 2022-24 წლის ომი

ბოკერია ბუჩაზე: მსოფლიო შეძრა, დისტანცირების სურვილი მხოლოდ ამორალურ მთავრობას აქვს

ევროპული საქართველო

ევროპული საქართველოს ლიდერის, გიგა ბოკერიას შეფასებით, საქართველოს პარლამენტის თავმჯდომარის, შალვა პაპუაშვილის უარი უკრაინის ქალაქ ბუჩაში ჩასვლაზე "გაგრძელებაა კიდევ უფრო ღრმა ჩავარდნის იმ პოლიტიკურ და მორალურ კატასტროფაში, რომელშიც ივანიშვილი და მისი გარემოცვა არის ჩავარდნილი".   

"სამწუხაროდ, [მორალურ კატასტროფაში] ირიბად ჩვენც გვაგდებს, რადგან ისინი წარმოგვადგენენ ჩვენ, როგორც ქვეყანას საერთაშორისო სარბიელზე. ეს მხოლოდ უკრაინის ამბავი კი არ არის, ჩვენი თავისუფლების საკითხიც არის და ესაა სამარცხვინო პოზიცია, რომელიც ყველაფერში გამოავლინეს, ყველა საჯაროდ დაფიქსირებულ განცხადებაში. 

ტრაგედიამ შეძრა მთელი მსოფლიო, ჩვენი ვალია, ბოლომდე მივყვეთ ამ საკითხს, დაისაჯოს ყველა, ვინც ეს ბოროტება ჩაიდინა, ამისგან დისტანცირების სურვილი შეიძლება ჰქონდეს ყოვლად ამორალურ და საკუთარი ქვეყნის ინტერესების მოღალატე მთავრობას". - ამბობს გიგა ბოკერია.  

8 აპრილს უკრაინის საელჩოში გამართულ ბრიფინგზე, საქართველოში უკრაინის ელჩის მოვალეობის დროებით შემსრულებელმა, ანდრი კასიანოვმა თქვა, რომ ბუჩის დანაშაულების შესაფასებლად საქართველოს პარლამენტის თავმჯდომარეს, შალვა პაპუაშვილს მოწვევა გაუგზავნეს. საპასუხოდ, საქართველოს პარლამენტში თქვეს, რომ მიწვევა არ მიუღიათ, შემდეგ კი ქართული ოცნების წარმომადგენლები მედიასთან საუბრობდნენ, რომ პაპუაშვილი ავად იყო.  

მოგვიანებით მოწვევას გამოეხმაურა შალვა პაპუაშვილი - პარლამენტის თავმჯდომარემ Facebook-ზე დაწერა, რომ წერილი ნამდვილად მიიღო, თუმცა, მისივე შეფასებით, უკრაინის მიერ მისი ბუჩაში ოფიციალური მიწვევა განმარტებებების გარეშე არასათანადოდ ჩანს.

"რაც შეეხება მოწვევას. ვისურვებდი, რომ უკრაინის ხელისუფლების ცალკეულ წარმომადგენლებს სრულად გაეაზრებინათ ის მტკიცე მხარდაჭერა, რომელსაც ქართველი ხალხი და მისი ხელისუფლება უკრაინის და უკრაინელი ხალხის მიმართ იჩენს. ეს მხარდაჭერა და ჩვენი ქვეყნების პარტნიორობა ნამდვილად არ იმსახურებს უკრაინის ხელისუფლების მაღალი თანამდებობის პირებისგან ქართველი ხალხის და მისი ხელისუფლების ერთმანეთისგან გამიჯვნის მცდელობას, საქართველოში მეორე ფრონტის გახსნის მოთხოვნას, დაუსაბუთებელ დიპლომატიურ დემარშებს, კონტრაბანდაში უსაფუძვლო დადანაშაულებას, თუ უკრაინელების უბედურებაზე ხელის მოთბობის სურვილის დაბრალებას, როგორც ეს ჩემი კოლეგის წინა მიმართვაში იყო. ამ საკითხების განუმარტებლობის ფონზე, ოფიციალური მოწვევა არასათანადოდ ჩანს.

ჩვენ არაერთხელ გვითქვამს და კიდევ გავიმეორებ, უკრაინის და უკრაინელი ხალხის მხარდაჭერა ჩვენი ადამიანური და ისტორიული ვალია, და ჩვენ ამ ვალს შევასრულებთ, რაც არ უნდა უსამართლო და უსაფუძვლო ბრალდებები გვესმოდეს საპასუხოდ". - დაწერა პარლამენტის თავმჯდომარემ. 

რუსი ოკუპანტები უკრაინაში მშვიდობიან მოქალაქეებს ხოცავენ - მას შემდეგ, რაც უკრაინელებმა ბუჩა დაიბრუნეს, ოკუპანტებისგან გათავისუფლებულ სოფელში 300-ზე მეტი მშვიდობიანი მოქალაქე მოკლული იპოვეს. რუსეთის თავდაცვის სამინისტრო ბრალდებებს უარყოფს და ამ ყველაფერს უკრაინის "უკანასკნელ პროვოკაციას" უწოდებს.   

რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო. პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში.

რუსეთის სამხედრო ძალები უკრაინას სხვადასხვა მიმართულებით უტევენ. პარალელურად, მსოფლიოს ქვეყნები რუსეთს სხვადასხვა სახის სანქციას უწესებენ. 

კომენტარები