"მთელი ერის მკვლელობის ოპერაცია" – ფოტოები გათავისუფლებული ბუჩიდან

ოკუპანტებისგან გათავისუფლებულ ბუჩაში 300-ზე მეტი მშვიდობიანი მოქალაქე მოკლული იპოვეს. "ეს მართლაც გენოციდია. მთელი ერის მკვლელობის ოპერაცია". - ასე გამოეხმაურა უკრაინის პრეზიდენტი, ვოლოდიმირ ზელენსკი გავრცელებულ კადრებს. 

უკრაინელმა სამხედროებმა კიევის ირგვლივ 30-ზე მეტი ქალაქი და სოფელი ოკუპანტებისგან გაათავისუფლეს.  ომის დაწყების შემდეგ უკრაინა კიევის რეგიონს სრულად პირველად აკონტროლებს. 

კიევის ოლქში ირპენზე, ბუჩაზე და გოსტომელზე უკრაინულმა ძალებმა ეტაპობრივად დაიბრუნეს კონტროლი.   

ბუჩის გათავისუფლების შემდეგ სასტიკად მოკლული მშვიდობიანი მოქალაქეების ფოტოები და ვიდეობი გავრცელდა. უკრაინის პრეზიდენტმა, ვოლოდიმირ ზელენსკიმ კიევის ოლქში რუსი სამხედროების მოქმედებები გენოციდად შეაფასა. უკრაინის საგარეო საქმეთა მინისტრმა, დმიტრო კულებამ საერთაშორისო სასამართლოსა და ორგანიზაციებს რუსი ჯარისკაცების მოქმედებების გამოძიებისკენ მოუწოდა. 

ბრიტანეთის პრემიერმინისტრის, ბორის ჯონსონის შეფასებით, რუსეთი ომის დანაშაულს სჩადის. 

რუსეთის თავდაცვის სამინისტრო დასავლეთის ლიდერების მხრიდან გამოხატული დამოკიდებულებების ფონზე, ბუჩაში 300-ზე მეტი მშვიდობიანი მოქალაქის მკვლელობის ბრალდებებს უარყოფს და ამ ყველაფერს უკრაინის "უკანასკნელ პროვოკაციას" უწოდებს.

• ზელენსკი: ეს მართლაც გენოციდია, მთელი ერის მკვლელობის ოპერაცია

• კულება ბუჩაზე: რუსების მიზანია, მოკლან იმდენი უკრაინელი, რამდენსაც შეძლებენ

• ჯონსონი: რუსეთი ომის დანაშაულს სჩადის, პუტინის ომის მანქანა უნდა გამოიფიტოს