რუსეთ-უკრაინის 2022 წლის ომი

ზელენსკის ოფისი: რუსეთი, შესაძლოა, სამთავრობო კვარტალს დაესხას თავს

მიხაილ პოდოლიაკი

პრეზიდენტის ოფისის ხელმძღვანელის მრჩევლის, მიხაილ პოდოლიაკის თქმით, რუსეთი შესაძლოა, სამთავრობო კვარტალს დაესხას თავს.

"იმიტომ რომ, შესაძლებელია, კიდევ ერთხელ აღვნიშნავ, წერტილოვანი სადესანტო გადასხმები. ახლა მიდის ძლიერი ბრძოლა გოსტომელში. შესაძლებელია სამთავრობო კვარტალში შეღწევის მცდელობა." - თქვა პოდოლიაკმა.

გოსტომელი საქალაქო ტიპის დასახლებაა კიევის ოლქში. უკრაინის სასაზღვრო ძალების ცნობით, რუსული ჯავშანტექნიკა კიევის ოლქში შევიდა.

უკრაინის ვიცეპრემიერმინისტრის ირინა ვერენშუკის თქმით, ხელისუფლების ყველა ორგანო რჩება სამთავრობო კვარტალში. ხოლო ევაკუაციის შესახებ გავრცელებული ინფორმაცია ყალბია.

"ბატონ მიხაილს და მე გვქონდა ონლაინ შეხვედრა რუს ჟურნალისტებთან, რომლებიც გვეკითხებოდნენ რისთვის არის მზად ჩვენი სახელმწიფო, როგორია ჩვენი ემოციები და რას განვიცდით. მინდა კიდევ ერთხელ ვთქვა, რომ ყველამ იცოდეს: ჩვენ აქ ვართ, ხელისუფლება აქ არის, პრეზიდენტი ადგილზეა, მთავრობა ადგილზეა, პარლამენტი ადგილზეა" - თქვა ვერენშუკმა.

მიხაილ პოდოლიაკმა ასევე აღნიშნა, რომ რუსეთის ერთ-ერთი მთავარი ამოცანა უკრაინის ხელისუფლების დამხობაა.

"რუსეთის მთავარი ამოცანებია - დაამხოს ქვეყნის ხელმძღვანელობა, შექმნას მაქსიმალური პანიკა და შეეცადოს მარიონეტული ხელისუფლების დაყენება." - თქვა პოდოლიაკმა.

რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის კიევის დაბომბვით დაიწყო.

ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმირ პუტინმა უკრაინას ომი ვიდეომიმართვით ოფიციალურად გამოუცხადა

პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში.

ომის გამოცხადებამდე უკრაინის პრეზიდენტმა, ვოლოდიმირ ზელენსკიმ პუტინთან დაკავშირება სცადა, თუმცა, მისივე ცნობით, პასუხად მხოლოდ სიჩუმე მიიღო. 

რუსეთის სამხედრო ძალები უკრაინას სხვადასხვა მიმართულებით უტევენ

კომენტარები