რუსეთის პრეზიდენტმა ვლადიმირ პუტინმა საფრანგეთის პრეზიდენტთან ემანუელ მაკრონთან შეხვედრის შემდეგ გამართულ პრესკონფერენციაზე თქვა, რომ უკრაინის NATO-ში გაწევრიანება რუსეთსა და ალიანსს შორის ომის დაწყების შესაძლებლობას აჩენს. პუტინმა აღნიშნა, რომ რუსეთი ბირთვული სახელმწიფოა და ომში გამარჯვებულები არ იქნებიან.
"თუ უკრაინა NATO-ს წევრი იქნება და თუ გადაწყვეტს, რომ სამხედრო გზებით ყირიმი დაიბრუნოს. ევროპული ქვეყნები ავტომატურად რუსეთთან ომში აღმოჩნდებიან. ორგანიზაცია NATO-ს და რუსეთი სამხედრო შესაძლებლობები ერთმანეთს არ შეედრება, ჩვენ ეს გვესმის, მაგრამ ჩვენ ასევე გვესმის, რომ რუსეთი ერთ-ერთი წამყვანი ბირთვული სახელმწიფოა, ზოგიერთ კომპონენტში, თანამედროვეობაში, ბევრს წინ ვუსწრებთ. გამარჯვებულები არ იქნებიან. და თქვენ აღმოჩნდებით ამ კონფლიქტში ჩათრეული. თვალის დახამხამებასაც ვერ მოასწრებთ, რომ რომის შეთანხმების მეხუთე პუნქტი იქნება გამოყენებული. ბატონ პრეზიდენტს [მაკრონს] რა თქმა არ სურს ეს განვითარება, არც მე მსურს. ამიტომაც არის აქ და უკვე 6 საათია მაწვალებს კითხვებით, გარანტიებით და გადაწყვეტილებების ვარიანტებით". – თქვა პუტინმა.
პუტინმა პრესკონფერენციაზე რამდენჯერმე აღნიშნა, რომ უკრაინის NATO-ში გაწევრიანების შემდეგ ყირიმის სამხედრო გზებით დაბრუნების სურვილი შეიძლება გახდეს ალიანსსა და რუსეთს შორის ომის მიზეზი.
უკრაინის საზღვრებთან დაძაბული ვითარების ფონზე NATO-ს აღმოსავლეთ ფლანგის გამტკიცებისთვის ევროპაში აშშ-ს დამატებმა სამხედრო ძალებმა უკვე დაიწყეს ჩასვლა. აშშ-ს პრეზიდენტ ჯო ბაიდენის თქმით, პოლონეთსა და რუმინეთში 3 000-მდე ჯარისკაცი განთავსდება. დასავლურ მედიაში გავრცელებული ინფორმაციით, რუსეთი უკრაინაში შეჭრისთვის 70%-იც მზად არის.
უკრაინასა და რუსეთს შორის დაძაბული მდგომარეობის ფონზე გავრცელდა ინფორმაცია, რომ რუსეთი შეჭრის წინაპირობის შესაქმნელად აღმოსავლეთ უკრაინაში ოპერაციას ამზადებს. CNN-ის ცნობით, მათი წყაროს თქმით, ბაიდენის ადმინისტრაციაში სჯერათ, რომ რუსეთი, შესაძლოა, უკრაინაში შეჭრისთვის ემზადებოდეს, "რაც გამოიწვევს ადამიანების უფლებების ფართოდ დარღვევასა და ომის დანაშაულს, თუ დიპლომატია საკუთარ მიზანს ვერ შეასრულებს".
2021 წლის 11 დეკემბერს რუსეთის საგარეო საქმეთა სამინისტრომ NATO-ს სთხოვა, რომ გააუქმოს 2008 წლის ბუქარესტის სამიტზე დადებული პირობა, საქართველოსა და უკრაინის ჩრდილოატლანტიკურ ალიანსში გაწევრიანებასთან დაკავშირებით.
რუსეთის მოთხოვნის საპასუხოდ NATO-ს გენერალური მდივანმა, იენს სტოლტენბერგმა თქვა, რომ ყველა ქვეყანას აქვს უფლება, აირჩიოს საკუთარი გზა, მათ შორის, თუ რა სახის უსაფრთხოების შეთანხმების მონაწილე სურს, რომ იყოს. მისივე შეფასებით, მიუღებელია, რომ რუსეთი ცდილობს, გავლენის სფეროების სისტემა აღადგინოს.
მოგვიანებით 17 დეკემბერს რუსეთის საგარეო საქმეთა სამინისტრომ გამოაქვეყნა აშშ-სთან და NATO-სთან უსაფრთხოების გარანტიებზე მოლაპარაკების პროექტი. რუსეთი ჩრდილოატლანტიკურ ალიანსსა და აშშ-ს, ფაქტობრივად, ჯარებისა და შეიარაღების 1997 წლის მაისის განლაგებაზე დაბრუნებას სთხოვს, ანუ იმ დროინდელ პოზიციებზე დაბრუნებას სანამ აღმოსავლეთ ევროპის ქვეყნებს NATO-ში მიიღებდნენ. ასევე, მოსკოვი კიდევ ერთხელ ითხოვს ალიანსის გაფართოების შეჩერებასა და მასში უკრაინის გაწევრიანების დაუშვებლობას უსვამს ხაზს. პროექტის მიხედვით, NATO-მ უნდა შეაჩეროს სამხედრო საქმიანობა უკრაინაში, აღმოსავლეთ ევროპაში, კავკასიასა და ცენტრალურ აზიაში.
იანვრის პირველ ნახევარში დასავლეთსა და რუსეთს შორის გამართული დიპლომატიური შეხვედრები უშედეგოდ დასრულდა.
პარალელურად უკრაინის საზღვრებთან რუსეთის სამხედრო ძალების თავმოყრის გამო ორ ქვეყანას შორის მდგომარეობა კვლავ დაძაბულია. კიევისა და ვაშინგტონის ცნობებით, უკრაინის საზღვრებთან ასიათასამდე რუსი სამხედროა თავმოყრილი. გრძელდება შეიარაღებული ძალების ამ ტერიტორიაზე უჩვეულო თავმოყრა და გადაადგილება. არსებობს შიში, რომ რუსეთი უკრაინაში შეჭრისთვის ემზადება.
ვრცლად უკრაინის საზღვრებთან არსებული დაძაბულობისა და ომის შესაძლებლობის შესახებ წაიკითხეთ აქ – უკრაინა ახალი ომის მოლოდინში – დასავლეთს ძილის დრო არ აქვს.
