ისრაელში ჩატარებული უახლესი კვლევის თანახმად, Pfizer-ის კოვიდ-19-ის საწინააღმდეგო ვაქცინის მეორე დოზის მიღებიდან ერთ კვირაში ვირუსით გამოწვეული სიკვდილიანობის წინააღმდეგ აცრა 96.7%-იანი ეფექტიანობით გამოირჩევა.
გარდა ამისა, კვლევით დგინდება, Pfizer-ის ვაქცინას 97.5%-იანი ეფექტიანობა აქვს Covid-19-ით გამოწვეული მძიმე გართულებების წინააღმდეგ.
"Pfizer-ის ვაქცინის ორი დოზა ძალზე ეფექტურია ყველა ასაკობრივ ჯგუფში სიმპტომური და ასიმპტომური ინფექციებისა და Covid-19-თან დაკავშირებული ჰოსპიტალიზაციის, მძიმე გართულებებისა და სიკვდილის თავიდან ასაცილებლად, მათ შორის ბრიტანული ვარიანტის წინააღმდეგაც". – წერია კვლევის დასკვნით ნაწილში.
თელ-ავივის უნივერსიტეტის პროფესორის, ჯონათან გერშონის თქმით, სამეცნიერო საზოგადოებამ კიდევ ერთხელ შეაფასა Pfizer-ის ვაქცინა და დაადასტურა მისი მაღალი ეფექტიანობა და შესაძლებლობები Covid-19-ის წინააღმდეგ.