საქართველოს მორაგბეთა ეროვნული ნაკრების კაპიტანი, მერაბ შარიქაძე ნინუცა მაყაშვილს სოლიდარობას უცხადებს.
"ჩემი სოლიდარობა ნინუცა მაყაშვილს. რაც შეეხება ოჯახში ძალადობას, თავისთავად, მე პირადად და ყველა მორაგბე ვგმობთ ნებისმიერ ძალადობას ოჯახში". – ამბობს მერაბ შარიქაძე.
მსახიობი და ტელეწამყვანი ნინუცა მაყაშვილი ყოფილ ქმარს, რუსთაველის თეატრის მსახიობ ბესო ზანგურს ადანაშაულებს არაერთგზის ცემაში, მათ შორის, ორსულობისას. მან რუსთავი 2-ის ეთერში, გადაცემა ფარულ კონვერტში თქვა, რომ ზანგურს 11 წლის წინ სწორედ ძალადობის გამო დაშორდა.
ამ ეტაპზე მაყაშვილს სოლიდარობა და მხარდაჭერა გამოუცხადეს მსახიობებმა: ნინო კასრაძემ, რუსკა მაყაშვილმა, ანა სანაიამ, ანი ბებიამ, გრიგოლ ჟორდანიამ, ნატალია ყულოშვილმა, ლელა მებურიშვილმა, ეკატერინე დემეტრაძემ, თამთა ინაშვილმა; რეჟისორებმა დათა თავაძემ, ელენე მაცხონაშვილმა, მიშა ჩარკვიანმა და სხვებმა.
რუსთაველის თეატრმა ინტერვიუს მიცემიდან მეორე დღეს Facebook-ზე დაწერა, რომ "თეატრი გმობს ყოველგვარ ძალადობას, მათ შორის ოჯახურ ძალადობას". თუმცა, თეატრის სამხატვრო ხელმძღვანელი, რეჟისორი რობერტ სტურუა ბესო ზანგურს გამოექომაგა და დაწერა, რომ "ქალებმა 1937 წელი და რეპრესიები დაიწყეს".
