19 მარტს გერმანიის კანცლერმა, ანგელა მერკელმა, განაცხადა, რომ შემოთავაზების შემთხვევაში, ის AstraZeneca-ს ვაქცინით აიცრებოდა.
"დიახ, ავიცრებოდი AstraZeneca-ს ვაქცინით". - თქვა მერკელმა პრესკონფერენციაზე.
მან ასევე აღნიშნა - "მინდა, დაველოდო მანამ, სანამ ჩემი ჯერი მოვა, მაგრამ ნებისმიერ შემთხვევაში [ავიცრებოდი]".
გერმანიამ AstraZeneca-თი აცრა 19 მარტს განაგრძო. ბადენ-ვიურტემბერგის პრემიერი, ვინგფრედ კრეშმანი AstraZeneca-ს ვაქცინით პირდაპირ ეთერში აიცრა.
"გქონდეთ ნდობა, აიცერით". - მან მოსახლეობას მიმართა.
ამავდროულად, იტალიის პრემიერმინისტრმა, მარიო დრაგიმ თქვა, რომ ის AstraZeneca-ს ვაქცინით აიცრება.
19 მარტს AstraZeneca-ს ვაქცინით აიცრა ბრიტანეთის პრემიერმინისტრი, ბორის ჯონსონი და საფრანგეთის პრემიერმინისტრი, ჟან კასტე.
18 მარტს ევროპის მედიცინის სააგენტომ თქვა, რომ AstraZeneca-ს ვაქცინასა და თრომბს შორის კავშირი არ დასტურდება.
ჯანდაცვის მსოფლიო ორგანიზაციამ ყველა ქვეყანა გააფრთხილა, რომ AstraZeneca-სთან დაკავშირებული შიშების გამო ვაქცინაციის კამპანია არ შეაჩერონ.
ბრიტანეთის წამლისა და ჯანმრთელობის პროდუქტების მარეგულირებელი სააგენტოს ინფორმაციით, არ არსებობს არანაირი მტკიცებულება იმისა, რომ AstraZeneca-ს ვაქცინა ვენებში სისხლის შედედებას იწვევს.
ლიტვამ, ლატვიამ, საფრანგეთმა, იტალიამ, კვიპროსმა, ბულგარეთმა და სხვა ევროპულმა ქვეყნებმა უკვე დაადასტურეს, რომ AstraZeneca-ს Covid-19-ის საწინააღმდეგო ვაქცინით აცრის პროცესი ისევ აღდგება.
