ივანიშვილის დეპუტატი გია ვოლსკი აცხადებს, რომ ქარდი, რომელზეც ივანიშვილი მერაბ კოსტავასთან და ზვიად გამსახურდიასთან ერთად არის გამოსახული, მისთვის "გაუგებარია."
მისი თქმით, ეს პოსტი ქართული ოცნების გუნდში არსებულ განწყობას არ შეესაბამება.
"არსებობს ასეთი ქარდებით ბრძოლა რა, გამოაქვეყნებენ, მერე რაღაცა განცხადებას გააკეთებენ ისეთს, რომელიც არ შეესაბამება არც პოლიტიკურ პროპაგანდას და არც პიარს, იმას, რომელსაც ესა თუ ის პოლიტიკური პარტია მისდევს.
ბიძინა ივანიშვილს არასდროს არ გაუტოლებია საკუთარი თავი არავისთვის. ძალიან წყნარად, ყოველგვარი დაყვედრების გარეშე, უამრავი პრობლემა განუხორციელებია ქვეყნისთვის პოლიტიკის შიგნით თუ პოლიტიკის გარეთ. არასოდეს თავისი თავი არ დაუყენებია ამ სამეულში. არც არის ეს ასე მოსააზრებელი. ყველას თავისი როლი და თავისი მნიშვნელობა აქვს ისტორიისთვის.
ეს ქარდი რას ნიშნავს, ჩემთვის ნამდვილად გაუგებარია, ვინაიდან ეს არანაირად არ შეესაბამება იმ განწყობას, რომელიც არსებობს ჩვენს გუნდში და გინდა, ბიძინა ივანიშვილის პირად დამოკიდებულებას. არასდროს არავის გვერდზე საკუთარი თავი არ მოუაზრებია მას პირადად და ჩვენც არასდროს გვითქვამს, რომ რაღაც საკითხებთან დაკავშირებით ერთად უნდა იყოს განხილული სხვადასხვა ისტორიული ფიგურა, მითუმეტეს ქართული ოცნების პარტიის დამფუძნებელი. საიდან მოიტანეს ეს ქარდი, ან ვინ ალაიქებს, ან ვინ აჰაჰავებს, თუ როგორც არის, ან ვინ არის გაბრაზებული, არ ვიცი. ტროლებიც თქვენ ხართ და ბოტებიც თქვენ ხართ. ტროლებით არ არის ქართული ოცნება დაკავებული." - ამბობს ვოლსკი მედიასთან.
26 მაისს, დამოუკიდებლობის დღეს, დიდი ბრიტანეთის მიერ დასანქცირებულმა TV იმედმა ქარდი დადო წარწერით - "საქართველოს დამოუკიდებლობის აღდგენის 35 წელი", რომელზეც ეროვნულ-განმათავისუფლებელი მოძრაობის ლიდერებთან - მერაბ კოსტავასა და ზვიად გამსახურდიასთან ერთად, ბიძინა ივანიშვილიც იყო გამოსახული.
ცნობისთვის, ორგანიზაცია სამართლიანი არჩევნების განცხადების მიხედვით, დააიდენტიფიცირეს "ქართული სახელის მქონე 1500-ზე მეტი ყალბი ანგარიში, ტროლი და ბოტი, რომლებიც გამოყენებული იქნა იმედის მიერ გამოქვეყნებულ პოსტზე მოწონების რეაქციების გასაზრდელად."
