ვაჭრობა

აშშ-ში ტანსაცმლის მაღაზიები ისტორიაში ყველაზე მაღალი ტემპით იხურება

აშშ-ში შოპინგ მოლების კრიზისი დაიწყო, დაბალი მოთხოვნის გამო წელს 9 ათასზე მეტი ტანსაცმლის მაღაზიის დახურვაა დაგეგმილი, რაც გლობალური ფინანსური კრიზისის პერიოდსაც კი აჭარბებს. მაღაზიების შემცირებას პრაქტიკულად ყველა ბრენდი გეგმავს. 

აშშ-ის დასაქმების ბიუროს მონაცემებით, ეკონომიკის სექტორების მიხედვით, 2017 წლის მარტში ყველაზე მეტი სამუშაო ადგილი ვაჭრობის, მიმართულებით დაიკარგა. მარტში აღნიშნული მიმართულებით დასაქმებულთა რაოდენობა 29 ათასით, თებერვალში კი 30 ათასით შემცირდა, ეს შემცირება 2009 წლის გლობალური ფინანსური კრიზისის შემდგომ ყველაზე მასშტაბურია.

Bloomberg-ის ინფორმაციით, აშშ-ში შოპინგ მოლების "ბუშტია". ქვეყანაში გასული წლების მანძილზე აშენდა ასობით ახალი შოპინგ მოლი, ისე რომ მათზე მოთხოვნა სათანადოდ არ იყო შესწვავლილი, ამ მოლებმა შედარებით იაფი რენტის გამო ტანსაცმლის მაღაზიები მიიზიდა, ახლა კი მომხმარებელთა ნაკლებობის გამო რიგი მაღაზიები იხურება. Urban Outfitters-ის ხელმძღვანელის რიჩარდ ჰაინის თქმით, ტანსაცმლის მაღაზიების ბუშტი ზუსტად ისევე სკდება, როგორც ეს 2007 წელს უძრავი ქონების ბაზარზე მოხდა. 

Credit Suisse-ის შეფასებით, 2017 წელს დაახლოებით 9 ათასი ტანსაცმლის მაღაზიის დახურვაა მოსალოდნელი, აღნიშნული მაჩვენებელი ფინანსური კრიზისის პერიოდს 3 ათასით აღემატება. 

ამ სავაჭრო ცენტრებში არსებული ვითარება ასე გამოიყურება:

ყველაზე მწვავედ მომხმარებელთა შემცირება Sears-ის, Abercrombie & Fitch-ს, Macy’s-ისა და J.C. Penney ბრენდებს ეხება. აღნიშნული კომპანიები წელს ასობით მაღაზიის დახურვას გეგმავენ. ზოგიერთი ბრენდი გადარჩენის მიზნით ელექტრონულ მაღაზიებად გარდაქმნას გეგმავენ.

აშშ-ში ჯამში 1.2 ათასი დიდი ზომის შოპინგ მოლია, Cushman & Wakefield-ის კვლევის მიხედვით 2010-2013 წლებში მომხმარებელთა რაოდენობა, ვინც $100-ზე მეტს ხარჯავს 50%-ით შემცირდა. ამ სავაჭრო ცენტრებიდან მდგომარეობა უმჯობესადაა დიდ ქალაქებში, სადაც მოთხოვნის მნიშვნელოვანი ნაწილი ადგილობრივ მოსახლოებასთან ერთად ტურისტებიდან გენერირდება. ვითარება მძიმეა ქვეყნის ცენტრალურ და სამხრეთ შტატებში. ქვეყნის პერიფერიაში D და C კატეგორიის სავაჭრო ცენტრების 1/3 მაღაზიების შემცირების გამო შეიძლება სრულად დაიხურონ. 

აშშ-ში ერთ მოქალაქეზე 23.5 კვადრატული ფუტი სავაჭრო სივრცე მოდის, აღნიშნული მაჩვენებელი აღემატება კანადის - 16.4 კვადრატული ფუტი, ავსტრალიის 11.1 კვადარტული ფუტი მაჩვენებელს. აშშ-ის მაჩვენებელი ევროპის საშუალო მაჩვენებელს ორჯერ აღემატება. იმ ფონზე კი როდესაც სულ უფრო მეტი ადამიანი ტანსაცმლის ყიდვას ონლაინ ამჯობინებს, და ამასთანავე ოჯახების ფინანსური მდგომარეობაც მაღალი ტემპით არ უმჯობესდება ახალი ტანსაცმლის მაღაზიების გახსნა სულ უფრო ნაკლებად მიმზიდველი ინვესტიცია ხდება.

კომენტარები