ქართული ოცნების კრიტიკის გამო, ტელეკომპანია მაესტრო ტენდენციურობაში მთავრობამ დაადანაშაულა. პარტიის ნაცვლად, განცხადება საკუთარ ვებგვერდზე სწორედ საქართველოს მთავრობამ გამოაქვეყნა. პრემიერის პრესსამსახურის განცხადებით, ქართულმა ოცნებამ მედია ხელისუფლების ზეწოლისგან გაათავისუფლა. ამასთან, საქართველოს მთავრობა აღნიშნავს, რომ თავისუფალი მედიაგარემო ზრდის ტელევიზიებისა და ჟურნალისტების პასუხისმგებლობას საზოგადოების წინაშე - მიაწოდონ მაყურებელს მიუკერძოებელი და ობიექტური ინფორმაცია.
პრემიერის პრესსამსახურის შეფასებით, ძნელია, მიუკერძოებელი ეწოდოს ტელეკომპანია მაესტროს ერთ-ერთ გადაცემას, რომელიც ჟურნალისტმა ვახო სანაიამ ქართული ოცნების დაპირებებს მიუძღვნა. მთავრობის განცხადებით, სიუჟეტები ატარებდა აშკარად ტენდენციურ ხასიათს, ხოლო ჟურნალისტი ცდილობდა, შეექმნა სურათი, თითქოს ხელისუფლებამ არც ერთი დაპირება არ შეასრულა.
„ამ სიცრუის გამყარებისთვის მან ქუჩაში ხალხის გამოკითხვის ხერხსაც მიმართა და ისეთი პასუხები შეარჩია, რომელიც გადაცემის მთავარ ხაზს გააძლიერებდა. ობიეტურობაზე პრეტენზიის მქონე ჟურნალისტს, ალბათ, არ უნდა გამორჩენოდა, რა მძიმე მემკვიდრეობა დახვდა ახალ ხელისუფლებას და ორ წელიწადში უკვე არსებობს თვალსაჩინო შედეგი, რომელსაც ყოველდღე გრძნობს მოსახლეობა. ხალხი ხედავს, რომ სწორედ ამ ხელისუფლებამ გაათავისუფლა სასამართლო და არ ერევა მის გადაწყვეტილებებში; გაათავისუფლა ბიზნესი, მედია; გათავისუფლებულია ათასობით პატიმარი, გაზრდილია სოციალური დახმარებები, განხორციელდა ჯანდაცვის რეფორმა (შემოღებულია საყოველთაო დაზღვევა), რომელიც მსოფლიო ბანკმა და ჯანდაცვის მსოფლიო ორგანიზაციამ წარმატებულად აღიარეს. ხარისხიანი და ხელმისაწვდომი ჯანდაცვით ასობით ათასმა ადამიანმა უკვე ისარგებლა, C ჰეპატიტთან ბრძოლის პროგრამა 60%-მდე უმცირებს მკურნალობის ხარჯებს დაავადებულებს. საქართველო მსოფლიო რეიტინგში მეორე იქნება, სადაც C ჰეპატიტის სამკურნალო საშუალება მოქალაქეთათვის ყველაზე დაბალ ფასად იქნება ხელმისაწვდომი. რაც შეეხება განათლებას, ამოქმედდა განათლების საერთაშორისო ცენტრი, რომლის დახმარებითაც ქვეყანას 5 წელიწადში ეყოლება საერთაშორისო განათლების მქონე, მაღალკვალიფიციური კადრები. განათლების ხელმისაწვდომობის მიზნით, მოქმედებს უფასო სახელმძღვანელოების და უფასო ფაკულტეტების პროგრამა. წარმატებით მიმდინარეობს სოფლის დახმარების პროგრამა, რომლითაც ასევე ასობით ათასმა მოქალაქემ ისარგებლა. გასულ წელს 700 000 ოჯახი, წელს კი 800 000 ოჯახი ჩაერთო სოფლის მეურნეობის სახელმწიფო პროგრამაში. რაც შეეხება სამართლიანობის აღდგენას, დაკავებულია არაერთი უმაღლესი თანამდებობის პირი, რომლებსაც ბრალი აქვთ წაყენებული უმძიმესი დანაშაულისთვის. იმ მძიმე სოციალურ-ეკონომიკურ ფონზე და არანაკლებ მძიმე პოლიტიკური ბრძოლებისა და კოჰაბიტაციის პირობებში, ცხადია, ვერ იქნებოდა მიღწეული ყველა სასურველი შედეგი. თუმცა, აშკარად ჩანს პოზიტიური ტენდენციები და 4-წლიანი ციკლისთვის მთავრობის დანაპირების შესრულება სრულიად რეალისტური და ოპტიმისტურია. ჩვენ არ გვაქვს პასუხი, რა მოტივაცია ამოძრავებდა ტელეკომპანია მაესტროს და მის ჟურნალისტს, რომ ტენდენციურად წარმოეჩინა რეალობა. თუმცა, იმედს ვიტოვებთ, რომ საზოგადოება თავად განსჯის და შეაფასებს, რას ენდოს და რას - არა“, - აცხადებს საქართველოს მთავრობა.
