მშრომელთა უფლებების დაცვის საერთაშორისო დღესთან დაკავშირებით, სტუდენტური მოძრაობა ლაბორატორია 1918-ის მიერ ორგანიზებული აქცია ინციდენტით დასრულდა.
აქცია დღის სამ საათზე, თბილისის სახელმწიფო უნივერსიტეტის პირველი კორპუსის ეზოში დაიწყო. მოგვიანებით, რუსთაველის გამზირზე მსვლელობისას, მონაწილეები გზის სავალ ნაწილზე გადავიდნენ, რასაც პატრულის თანამშრომლებთან შეხლა-შემოხლა მოჰყვა. შედეგად, პოლიციამ დემონსტრაციის 20-მდე მონაწილე დააკავა. აქციის მონაწილეები ამბობენ, რომ სამართალდამცავები მათ ფიზიკურ და სიტყვიერ შეურაცხყოფას აყენებდნენ, პოლიციის ცნობით კი მათ საზოგადოებრივი წესრიგი დაარღვიეს. ლაბორატორია 1918-მა განცხადებაც გაავრცელა, სადაც ისინი სამოქალაქო ფორმაში გამოწყობილ პირებს აქციაზე პროვოკაციის მოწყობაში ადანაშაულებენ.
აქციის დაშლის შემდეგ მონაწილეთა ნაწილმა შინაგან საქმეთა სამინისტროსთან გადაინაცვლა. მალევე, ცნობილი გახდა, რომ ყველა დაკავებული, ხელწერილის საფუძველზე, გაათავისუფლეს. მათ მიმართ ადმინისტრაციული ზომების გატარებაზე სასამართლო ხვალ იმსჯელებს.