ია დარახველიძე, რომელსაც დღეს მოსამართლე გიორგი გელაშვილმა 4 ოქტომბრის საქმეზე 5 წლით პატიმრობა მიუსაჯა სოციალურ ქსელში პოსტს აქვეყნებს და წერს, რომ ქვეყანა დატოვა.
დარახველიძე სასამართლო პროცესს არ დასწრებია. პროკურორის განცხადებით, მას არ ჰქონდა ინფორმაცია მისი ადგილსამყოფელის შესახებ.
როგორც დარახველიძე წერს, იმყოფება "იმ ქვეყანაში, სადაც ყველა ადამიანის უფლებები დაცულია".
"ეს დღე უმძიმესია ჩემთვის! პირველ რიგში იმიტომ რომ ჩვენი უდანაშაულო, მებრძოლი ადამიანები გაუშვეს ციხეში!
დავით ჟღენტი, კონსტანტინე კოკაია, კახაბერ მჟავანაძე, გიორგი ჩახუნაშვილი, ზაქრო ალბუთაშვილი, დავით სტურუა - გმირები ხართ ჩემთვის და მთელი საქართველოსთვის! მთელი დასავლეთ სამყაროსთვის!
მე კარგად ვარ! ჩემზე არ ინერვიულოთ!..
სამყარო რომელშიც ჩვენ ვცხოვრობთ, სავსეა ბოროტებით და ამის წინააღმდეგ ყველას ჩვენი ხმა თუ ქმედება, მნიშველოვანია!
მე წავედი იმ ქვეყანაში, სადაც ყველა ადამიანის უფლებები დაცულია. ვიცი, ჩემი ციხეში ჩაჯდომა არავის გაგიხარდებოდათ და კიდევ ერთი ტკივილი და საზრუნავი იქნებოდა თქვენთვის, ამ ისედაც პრობლემებით სავსე საქართველოში არ მინდა, ჩემზე ნერვიულობაც დაგმატებოდათ. ისედაც ძალიან ბევრი პოლიტპატიმარი გვყავს და არავის ვუსურვებ იმ მდგომარეობაში აღმოჩენას, რომელშიც ისინი არიან.
მჯერა, რომ უსამართლობას თავისი დასასრული ექნება და ყველა ადამიანი, ვინც პასუხისმგებელია ამ ყველაფერზე, აუცილებლად აგებს პასუხს. მე პირადად ვაპირებ, ბოლომდე გავაგრძელო ეს ბრძოლა და რეჟიმის ყველა წევრს ვაგებინო პასუხი!!
მივხვდი რომ ჯერ დრო არ დამდგარა ამის, მაგრამ ისიც ხომ ვიცით რომ ამ ომს მოვიგებთ!!! იცით და არ ვნებდებით!! არ დავნებდებით!!
მალე სულ მალე იქნება ეს დღე!!
მიყვარხართ უზომოდ და მინდა რომ შიშმა არ მოგიცვათ!
ყოველდღე თქვენი სიტყვა თუ ქმედება ამ რეჟიმს ასუსტებს და ბოლოს ჩამოშლის კიდევაც.!!
თავისუფლება ყველა პოლიტპატიმარს!!" - წერს დარახველიძე.
ცნობისთვის, დღეს 4 ოქტომბრის საქმეზე ბრალდებული 7 პირის განაჩენი გამოცხადდა. შვიდივე მათგანს 5 წლით პატიმრობა მიესაჯათ. მოსამართლე გიორგი გელაშვილს განაჩენის გამოცხადება შეეშალა, თავდაპირველად მან თქვა რომ ია დარახველიძეს 3-წლიანი პატიმრობა მიუსაჯა, თუმცა როგორც აღმოჩნდა, მასაც 5 წლით მიუსაჯა თავისუფლების აღკვეთა.
ია დარახველიძეს აღკვეთის ღონისძიების სახით გირაო ჰქონდა შეფარდებული და თავისუფლებაში იმყოფებოდა.
