დიუშენის კუნთოვანი დისტროფიის მქონე ბავშვების მშობლების განცხადებით, მედიკამენტებზე შეთანხმება შედგა და დაახლოებით ორ თვეში ორი კონკერტული მედიკამენტი საქართველოში შემოვა.
თამარ გოგოლაძის თქმით, კობახიძესთან მეორედ გამართული შეხვედრის შემდეგ, გადაწყვეტილება უკვე მიღებულია და სამუშაო ჯგუფი მუშაობას დღეიდან დაიწყებს.
"შედგა მეორე შეხვედრა და ჩვენ შეგვიძლია ვთქვათ დანამდვილებით, რომ ეს არის გამარჯვება, რადგან გადაწყვეტილება უკვე მიღებულია, ეჭვქვეშ არ დგას. მუშაობა იწყება კონკრეტულ მედიკამენტებზე დღეიდან და ალბათ, ორი თვის ვადაში მედიკამენტები იქნება უკვე საქართველოში, ბავშვები დაიწყებენ ამ მედიკამენტების მიღებას. თუ გვინდა, რომ ბავშვების მდგომარეობა არ დავაზარალოთ, კონკრეტული შეკითხვებისგან თავი შევიკავოთ - რომელი მედიკამენტი, რატომ - რათა კომპანიების ინტერესებიც უნდა გავითვალისწინოთ ამ პროცესში.
მთავარია, რომ დიუშენის თემა გადაწყდა ჩვენს ქვეყანაში. შეგვიძლია ვთქვათ, რომ ბევრ ქვეყნებს შორის ერთ-ერთია საქართველო, სადაც უკვე იქნება დიუშენის მკურნალობა, ეს არის სასწაული. სამუშაო ჯგუფში ვართ ჩვენც, მშობლები, ყველაფერში მივიღებთ მონაწილეობას. ძირითადად ორი მედიკამენტით დაიწყება, მაგრამ ეს არ ნიშნავს, რომ პროცესი დასრულდა, ცოტა მეტი პროცესი სჭირდება დანარჩენ მედიკამენტებს. პირველ ეტაპზე, ყველაზე მოკლე ვადაში, რა გადაწყვეტილებაც შეიძლებოდა მიღებულიყო, ეს გადაწყვეტილება მივიღეთ საბოლოოდ". - თქვა გოგოლაძემ.
ივანიშვილის პრემიერმა, ირაკლი კობახიძემ დიუშენით დაავადებული ბავშვების მშობლებთან შეხვედრის შემდეგ გამართულ ბრიფინგზე განაცხადა, რომ დიუშენის მქონე ბავშვებისთვის შეიქმენა სამუშაო ჯგუფი.
კობახიძის განცხადებით, შეჯერდნენ "კონკრეტულ მედიკამენტებზე", ხოლო მათი შესყიდვის საბოლოო გადაწყვეტილება სხვადასხვა ფაქტორის, მათშორის, ფარმაცევტული კომპანიების შემოთავაზებული პირობების გათვალისწინებით მოხდება.
ცნობისთვის, დიუშენით დაავადებული ბავშვების მშობლები კობახიძეს პირველად გუშინ, 5 მაისს შეხვდნენ.
შეხვედრის შემდეგ კომენტარი გააკეთეს მშობლებმა და თქვეს, რომ კობახიძესთან შეხვედრას დაპირების ფორმა არ ჰქონია და რომ შეიქმნება სამუშაო ჯგუფი.
ხოლო, კობახიძემ განაცხადა, რომ საკითხი "ძალიან მგრძნობიარეა" და იმედი აქვს ერთად გამოძებნიან "ამ საკითხის გადაჭრის გზებს."
19 მაისს, მშობლები საქართველოს კათოლიკოს-პატრიარქმა შიო მესამემ მიიღო.
რამდენიმე თვეა, დიუშენით დაავადებული ბავშვების მშობლები წამლის მოთხოვნით აქციებს მართავენ - 45-ე დღეა, ისინი ღამეებს ივანიშვილის მთავრობის კანცელარიასთან ათევენ.
დიუშენის კუნთოვანი დისტროფია (DMD) იშვიათი გენეტიკური დაავადებაა, რომელიც კუნთების ატროფიით (განლევით) და სისუსტით გამოიხატება. ორგანიზაცია ერთად ვებრძოლოთ დიუშენის კუნთოვან დისტროფიას ცნობით, საქართველოში დიუშენით დაავადებული 100-მდე ბავშვია რეგისტრირებული. სათანადო მედიკამენტების და მკურნალობის არარსებობის გამო საქართველოში ყოველწლიურად ამ დაავადებით 1, 2 ან 3 ბავშვი იღუპება.
ორგანიზაცია ერთად ვებრძოლოთ დიუშენის კუნთოვან დისტროფიას თავმჯდომარე, ზაქარია გვიშიანი ამბობს, რომ მედიკამენტებს უსაფრთხოებისა და ეფექტურობის მხარე გავლილი აქვს და არსებობს მაგალითები, ჩვენი მოქალაქეები, რომლებმაც ეს მედიკამენტები ევროპაში მიიღეს და თავს ძალიან კარგად გრძნობენ.
