ივანიშვილის პრემიერმა, ირაკლი კობახიძემ დიუშენის დაავადების მქონე ბავშვების მშობლებთან შეხვედრასთან დაკავშირებით კომენტარი გააკეთა.
"დღეს პირველი შეხვედრა გვქონდა, სადაც მოსაზრებები და ინფორმაცია გავცვალეთ სხვადასხვა საკითხზე, მათ შორის, კონკრეტულად მედიკამენტებთან დაკავშირებით. დღევანდელი შეხვედრის მიზანი ეს იყო. თავიდანვე, შეხვედრის დასაწყისშივე შევთანხმდით, რომ მეორე შეხვედრა მაქსიმუმ ზეგ დილამდე შედგება, სადაც, იმედი გვაქვს, ერთად დავსახავთ საკითხის გადაჭრის გზებს. მეორე შეხვედრის მიზანი ეს იქნება.
იმედი გვაქვს, ამ საკითხისთვის ერთობლივი გადაწყვეტა გამოიძებნება. ძალიან მგრძნობიარე საკითხია. პირველ რიგში, ჩვენ ბავშვების ინტერესებიდან უნდა ამოვიდეთ. კიდევ ერთხელ, იმედი გვაქვს, ჩვენ ერთად გამოვძებნით ამ საკითხის გადაჭრის გზებს". - თქვა კობახიძემ ჟურნალისტებთან საუბარში.
დღეს, 3 ივნისს, ირაკლი კობახიძე დიუშენით დაავადებული ბავშვების მშობლებს შეხვდა. შეხვედრა 2 საათის განმავლობაში გაგრძელდა და მას ივანიშვილის ჯანდაცვის მინისტრი, მიხეილ სარჯველაძეც ესწრებოდა.
შეხვედრის დასრულების შემდეგ, ერთ-ერთმა მშობელმა, ზაქარია გვიშიანმა თქვა, რომ ისინი შეთანხმდნენ, რომ სამუშაო ჯგუფი შეიქმნება, რომელიც შეხვედრების ფორმატში იქნება.
რამდენიმე თვეა, დიუშენით დაავადებული ბავშვების მშობლები წამლის მოთხოვნით აქციებს მართავენ - 44-ე დღეა, ისინი ღამეებს ივანიშვილის მთავრობის კანცელარიასთან ათევენ.
დიუშენის კუნთოვანი დისტროფია (DMD) იშვიათი გენეტიკური დაავადებაა, რომელიც კუნთების ატროფიით (განლევით) და სისუსტით გამოიხატება. ორგანიზაცია ერთად ვებრძოლოთ დიუშენის კუნთოვან დისტროფიას ცნობით, საქართველოში დიუშენით დაავადებული 100-მდე ბავშვია რეგისტრირებული. სათანადო მედიკამენტების და მკურნალობის არარსებობის გამო საქართველოში ყოველწლიურად ამ დაავადებით 1, 2 ან 3 ბავშვი იღუპება.
ორგანიზაცია ერთად ვებრძოლოთ დიუშენის კუნთოვან დისტროფიას თავმჯდომარე, ზაქარია გვიშიანი ამბობს, რომ მედიკამენტებს უსაფრთხოებისა და ეფექტურობის მხარე გავლილი აქვს და არსებობს მაგალითები, ჩვენი მოქალაქეები, რომლებმაც ეს მედიკამენტები ევროპაში მიიღეს და თავს ძალიან კარგად გრძნობენ.
