საქართველოს საგარეო საქმეთა სამინისტროში ტაბულას უთხრეს, რომ ამ დრომდე უწყებაში არ შემოსულა ინფორმაცია საქართველოს მოქალაქეების დაკავებასთან დაკავშირებით.
უწყებაში ამბობენ, რომ "2026 წლის 15 იანვარს აშშ-ს მიერ კარიბის ზღვაში დაკავებული ტანკერის ვერონიკას ეკიპაჟის შემადგენლობაში საქართველოს მოქალაქეების ყოფნასთან დაკავშირებით ღია წყაროებში გავრცელებული ინფორმაციის დასაზუსტებლად საქართველოს საელჩო აშშ-ში ახორციელებს შესაბამის სამუშაოებს."
გემზე ქართველი მეზღვაურების ყოფნის შესახებ ინფორმაცია რადიო თავისუფლებამ გაავრცელა. მედიის ცნობით, მათ მეზღვაურების ოჯახის წევრებმა მიაწოდეს ინფორმაცია, რომ ვერონიკას ეკიპაჟს შორის, 5 ქართველი მეზღვაური იყო.
ცნობისთვის, აშშ-ს სამხრეთ სარდლობამ, 15 იანვარს განაცხადა, რომ აშშ-მ კარიბის ზღვაში კიდევ ერთი ნავთობტანკერი ვერონიკა დააკავა.
სამხრეთ სარდლობა X-ზე წერს, რომ დაკავების ოპერაცია ავიამზიდ USS Gerald R. Ford-დან ინციდენტების გარეშე ჩატარდა.
"ვერონიკა უახლესი ტანკერია, რომელიც პრეზიდენტ ტრამპის მიერ კარიბის ზღვაში სანქცირებული ხომალდებისთვის დაწესებული ბლოკადის წინააღმდეგ მოქმედებდა. [...] ვენესუელად მხოლოდ სათანადოდ და კანონიერად კოორდინირებული ნავთობი დატოვებს" - ნათქვამია სოციალურ ქსელში გავრცელებულ განცხადებაში.
