19 ოქტომბერს დილით, პარიზში ქურდებმა რამდენიმე წუთში მსოფლიოში ერთ-ერთი ყველა ცნობილი, ლუვრის მუზეუმი გაძარცვეს, საიდანაც, მათ შორის, ნაპოლეონისა და მისი ცოლის "შეუფასებელი ღირებულების" მქონე სამკაულები და ძვირფასი ნივთები წაიღეს.
ამავე დღეს, ლუვრი, რომელიც მსოფლიოში ყოველწლიურად, ყველაზე მეტ დამთვალიერებელს მასპინძლობს (მხოლოდ 2024 წელს 8.7 მილიონი ვიზიტორი), ერთი დღით დაიკეტა, რადგან ადგილზე საგამოძიებო მოქმედებები მიმდინარეობდა.
საფრანგეთის კულტურის სამინისტროს ცნობით, ქურდების სამიზნე ლუვრის აპოლოს გალერეა გახდა, რომელშიც საფრანგეთის სამეფო ძვირფასეულობა ინახებოდა.
უწყების განცხადებით, მძარცველების მუზეუმში შეღწევის მიზნით, ლუვრის ერთ-ერთ აივნის ფანჯარა ჩაამტვრიეს, შედეგად კი უსაფრთხოების სისტემა ჩაირთო, რასაც მუზეუმის უსაფრთხოების სამსახურის თანამშრომლების მყისიერი რეაგირება მოჰყვა. ამის გამო მძარცველებს გზაში დაუვარდათ მეცხრე მოპარული ნივთი, ეუხენია დე მონტიხოს საიმპერატორო გვირგვინი, რომელიც ექსპერტიზაზეა წაღებული.
ლუვრიდან მოპარული ძვიფასეულობა:
საფირონის თვლებით გაწყობილი დიადემა, ყელსაბამი და საყურეები, რომლებიც სხვადასხვა დროს დედოფალ მარი-ამელის და დედოფალ ჰორტენზიას ეკუთვნოდათ
ნაპოლეონის მეორე ცოლის, მარი ლუიზის ზურმუხტის ყელსაბამი და საყურეები
ნაპოლეონ III-ს ცოლის, ეუხენია დე მონტიხოს გულსაბნევი "რელიქვია", რომელიც ჯამში 94 ბრილიანტითაა მორთული
ნაპოლეონ III-ს ცოლის, ეუხენია დე მონტიხოს ბრილიანტის გულსაბნევი
ნაპოლეონ III-ს ცოლის, ეუხენია დე მონტიხოს მარგალიტის დიადემა
ნაპოლეონ III-ს ცოლის, ეუხენია დე მონტიხოს 2500-მდე ბრილიანტითა და 56 ზურმუხტით მორთული ოქროს საიმპერატორო გვირგვინი, რომელიც მძარცველებს გაქცევისას დაუვარდათ
