Interfax-ის ინფორმაციით, უკრაინის თავდაცვის მინისტრმა, დენის შმიგალმა განაცხადა, რომ უკრაინა და პოლონეთი უპილოტო სისტემებისთვის ახალი ერთობლივი სამუშაო ჯგუფის შექმნაზე შეთანხმდნენ.
შმიგალმა ამის შესახებ პოლონეთის თავდაცვის მინისტრთან, ვლადისლავ კოსინიაკ-კამიშთან ერთად გამართულ პრესკონფერენციაზე ისაუბრა. კოსინიაკ-კამიში პოლონეთის თავდაცვის სამინისტროს სხვა მაღალჩინოსნებთან ერთად კიევში 18 სექტემბერს ჩავიდა.
10 სექტემბერს პოლონეთის ოპერატიულმა სარდლობამ გაავრცელა ცნობა, რომ უკრაინაზე თავდასხმის დროს რუსულმა დრონებმა მათი საჰაერო სივრცე უპრეცედენტოდ დაარღვიეს. პოლონეთის ოპერატიულმა სარდალმა რამდენიმე დრონის ჩამოგდების გადაწყვეტილება მიიღო.
შმიგალის თქმით, ახალი პოლონურ-უკრაინული ჯგუფი იქნება პლატფორმა ერთობლივი ინიციატივების განვითარებასა და სასწავლო პროგრამებზე ფოკუსირებისთვის.
"ჩვენ დავიწყებთ ბოლო თავდაცვითი ტექნოლოგიების ინტეგრირებასა და ახალი პროექტების დაწყებას, რომლის მიზანიც ჩვენი ხალხის დაცვისა და ჩვენი კრიტიკული ინფრასტრუქტურის გაძლიერება იქნება," დაამატა შმიგალმა.
თავის მხრივ, კოსინიაკ-კამიშმაც დაადასტურა, რომ უკრაინისა და პოლონეთის თავდაცვის სამინისტროები თანამშრომლობის შესახებ შეთანხმების ხელმოწერას აპირებენ, რომელიც ნაწილობრივ ფოკუსირებული იქნება დრონების საოპერაციო შესაძლებლობების გაძლიერებაზე.
პოლონეთის თავდაცვის მინისტრის თქმით, კიდევ ერთი პრიორიტეტი უკრაინის საბრძოლო გამოცდილების საფუძველზე პოლონელი სამხედროების უნარების გაუმჯობესება იქნება.
