სააგენტო Reuters-ი Marine Traffic-ის მონაცემებზე დაყრდნობით წერს, რომ აშშ-ს ავიამზიდმა USS Nimitz-მა სამხრეთ ჩინეთის ზღვა დატოვა და დასავლეთის მიმართულებით მიემართება.
Reuters-ის ცნობით, ავიამზიდი 20 ივნისს ვიეტნამის ქალაქ დანანგში უნდა ჩასულიყო, თუმცა დიპლომატიური წყაროს ინფორმაციით, ოფიციალური მიღება გაუქმდა.
წყაროს თქმით, ჰანოიში აშშ-ს საელჩომ მას აცნობა, რომ ვიზიტი "გადაუდებელი ოპერატიული აუცილებლობის" გამო გაუქმდა.
Marine Traffic-ის მონაცემებით, 16 ივნისის დილას ავიამზიდი ახლო აღმოსავლეთის მიმართულებით მოძრაობდა.
მანამდე, 13 ივნისს, აშშ-ს საბრძოლო გემი USS Thomas Hudner, რომელიც ბალისტიკური რაკეტებისგან თავდაცვის უნარს ფლობს, დასავლეთ ხმელთაშუა ზღვის რეგიონიდან აღმოსავლეთით გადააადგილეს.
აშშ-ს კიდევ ერთი ავიამზიდი USS Carl Vinson ამჟამად არაბეთის ზღვაშია დისლოცირებული.
გამოცემა The Times of Israel-ის წყაროს ინფორმაციით, რეგიონში შესაძლოა კიდევ ერთი ავიამზიდი, USS George Washington გაიგზავნოს.
