27 მარტს, სამხრეთ კორეის გაერთიანებულმა ძალებმა განაცხადა, ჩრდილოეთ კორეამ მიმდინარე წლის დასაწყისში რუსეთში დამატებით 3 000-ზე მეტი ჯარისკაცი გააგზავნა.
სამხრეთ კორეის გაერთიანებული შტაბის ინფორმაციით, იანვარსა და თებერვალში გაგზავნილი ეს დამატებითი ძალები რუსეთში განლაგებულ დაახლოებით 11 000 ჩრდილოეთ კორეელ ჯარისკაცს შეუერთდებიან. სეულის ცნობით, მათგან დაახლოებით 4 000 ბრძოლაში დაიღუპა ან დაიჭრა.
სამხრეთ კორეის თქმით, ფხენიანმა რუსეთს ასევე მიაწოდა "მნიშვნელოვანი რაოდენობის" მცირე მანძილზე მოქმედი ბალისტიკური რაკეტები, დაახლოებით 220 ერთეული 170-მილიმეტრიანი თვითმავალი ჰაუბიცა და რამდენიმე 240-მილიმეტრიანი სარაკეტო გამშვები დანადგარი. განცხადებაში ასევე აღნიშნულია, რომ ჩრდილოეთ კორეის სამხედრო დახმარება ბრძოლის ველზე "მდგომარეობის მიხედვით შესაძლოა გაიზარდოს".
ჩრდილოეთ კორეა რუსეთის ერთ-ერთი მთავარი მოკავშირეა უკრაინასთან ომში. ფხენიანის მიერ გაგზავნილი სამხედროები გასული წლის ნოემბერში უკრაინის წინააღმდეგ კურსკის მიმართულებით ბრძოლებში მონაწილეობდნენ. ჩრდილოეთ კორეის ლიდერმა, კიმ ჩენ ინმა 10 თებერვალს კიდევ ერთხელ ხაზგასმით დაადასტურა მხარდაჭერა რუსეთის მიმართ.
უკრაინის თავდაცვის მინისტრმა 5 ნოემბერს პირველად განაცხადა, რომ უკრაინელი სამხედროები პირველად დაუპირისპირდნენ კურსკის ოლქში გადასხმულ ჩრდილოეთკორეელთა დანაყოფებს.
თუმცა, 21 ოქტომბერს მოსკოვში გამართულ ბრიფინგზე კრემლის პრესსპიკერმა, დმიტრი პესკოვმა ჩრდილოეთ კორეიდან რუსეთში ჯარების გადაყვანასთან დაკავშირებული ინფორმაცია არც უარყო და არც დაადასტურა.
ორი დღის შემდეგ აშშ-მ პირველად განაცხადა, რომ რუსეთში ჩრდილოეთ კორეელი ჯარისკაცების ყოფნის დამადასტურებელი მტკიცებულებები აქვთ. ამას გარდა, სამხრეთ კორეის პარლამენტარებმა განაცხადეს, რომ ჩრდილოეთ კორეამ დაახლოებით 3 000-მდე ჯარისკაცი გაგზავნა უკრაინასთან ომში რუსეთის მხარდასაჭერად.
რადიო თავისუფლება რუსეთის სტატისტიკის ფედერალურ სამსახურზე დაყრდნობით ავრცელებს ინფორმაციას, რომ 2024 წელს რუსეთში ჩრდილოეთ კორეის 13 221 მოქალაქე შევიდა, რაც წინა წელზე თორმეტჯერ მეტია. აქედან, ნახევარზე მეტმა მიზეზად "განათლების მიღება" დაასახელა.
