საქართველოს ძიუდოს ფედერაცია ავრცელებს ინფორმაციას, რომ ლევან გიგინეიშვილი ძიუდოისტებს პლატონსა და არისტოტელეზე ლექციებს უკითხავს.
გავრცელებული ინფორმაციის მიხედვით, პროექტის ძიუდო & განათლება ფარგლებში, ამ ეტაპზე, ფილოლოგ ლევან გიგინეიშვილის 4 საგანმანათლებლო ლექცია ჩატარდა, როგორც ეროვნული, ისე სხვადასხვა ასაკობრივი ნაკრებებისთვის.
"ამიერიდან კი ლექციები პერმანენტულად გაიმართება. ძიუდოს ფედერაციისა და ლევან გიგინეიშვილის ერთობლივი პროექტის ფარგლებში პირველ ეტაპზე U21 ნაკრებისთვის გაიმართება ლექციათა ციკლი სახელწოდებით:
რა არის ევროპა?
ლექციათა ციკლი მოიცავს რვა შეხვედრას U21 ნაკრებთან შემდეგ თემებზე:
- ბერძნული მითოლოგია: რა როლი ჰქონდა მითოლოგიას სამყაროს აღქმაში, სამყაროს მოვლენების ორგანიზაციაში და მოწესრიგებაში.
- ჰომეროსის პოემები „ილიადა“ და „ოდისეა“ (ორი საუბარი)
- ფილოსოფიის წარმოშობა და მისი განსხვავება მითოლოგიისგან
- დემოკრატიის წარმოშობა, რა არის დემოკრატიული ქალაქი
- პლატონი და არისტოტელე - სამყარო და იდეალური ქალაქი, პოლიტიკა.
- ბიბლიური კულტურა, ქრისტიანობა, საქართველოს გაქრისტიანება
- რენესანსი - ქართული (პეტრიწი, რუსთაველი) და ევროპული
- ევროპული განმანათლებლობა და ქართული განმანათლებლობა (ილია, თერგდალეულები)
პროექტის შემდეგ ეტაპზე ლექციათა ციკლი დაიგეგმება სხვა ასაკობრივ ნაკრებებთანაც" - წერს ძიუდოს ფედერაცია.
