უნგრეთის საგარეო საქმეთა მინისტრის, პიტერ სიიარტოს თქმით, უნგრეთი "აბსოლუტურად დაინტერესებულია" რუსეთთან თანამშრომლობის ისეთ სფეროებში განვითარებით, რომლებიც საერთაშორისო სანქციებს არ ექვემდებარება. ამის შესახებ სიიარტომ რუსულ სამთავრობო-პროპაგანდისტულ გამოცემა RIA Novosti-სთან ინტერვიუში ისაუბრა.
"ჩვენ მუდმივ კონტაქტზე ვართ რუსებთან, რუსეთის მთავრობასთან, რადგან ჩვენ გვაქვს გაცხადებული სტრატეგია და პოზიცია. ჩვენ არასდროს დაგვიმალავს ეს და ამაზე ყოველთვის ღიად ვსაუბრობთ: იმ სფეროებში, რომლებსაც [საერთაშორისო] სანქციები არ შეხებიათ, ჩვენ აბსოლუტურად დაინტერესებულები ვართ თანამშრომლობის გაფართოებით". - თქვა სიიარტომ.
შეკითხვაზე, გეგმავდა თუ არა უნგრეთის პრემიერმინისტრი ვიქტორ ორბანი რუსეთში ვიზიტს 2025 წელს, სიიარტომ უპასუხა, რომ ასეთი ვიზიტი საჭიროების შემთხვევაში შესაძლებელი იყო.
"როდესაც არსებობს საჭიროება, რომ პრემიერმინისტრი [ორბანი] პირადად გაესაუბროს პრეზიდენტს [პუტინს], ისინი, რა თქმა უნდა, ამ შესაძლებლობას იყენებენ და ერთმანეთს ხვდებიან". - დაამატა უნგრეთის საგარეო საქმეთა მინისტრმა.
სიიარტომ ასევე გაუსვა ხაზი [რუსეთთან] "პირდაპირი დიალოგისა" და "მშვიდობის იმედის" შენარჩუნების მნიშვნელობას.
"თუ შენ [რუსეთთან] კომუნიკაციას გაწყვეტ, შენ მშვიდობის იმედს დაკარგავ. და ეს არის ის, რაც ჩვენ ნამდვილად არ გვსურს". - თქვა სიიარტომ.
