უნგრეთის საგარეო საქმეთა მინისტრმა პიტერ სიიარტომ განაცხადა, რომ უნგრეთი ვეტოს დაადებს ევროკავშირის მხრიდან საქართველოს შინაგან საქმეთა მინისტრისა და პოლიციის უფროსების დასანქცირების მცდელობებს.
ამის შესახებ განცხადება უნგრეთის მთავრობის პრესსპიკერმა საერთაშორისო საკითხებში, ზოლტან კოვაჩმა, X-ზე გაავრცელა.
"ბუდაპეშტში სიიარტომ განაცხადა, რომ უნგრეთი ვეტოს დაადებს ევროკავშირის სანქციებს, რომლის სამიზნეც საქართველოს შინაგან საქმეთა მინისტრი და პოლიციის უფროსები იქნება და [სანქციების შესახებ] ამ წინადადებას მან "აბსურდული და გაუმართლებელი უწოდა". - წერს კოვაჩი.
მანამდე, 9 დეკემბერს, საქართველოში ევროკავშირის ელჩმა პაველ ჰერჩინსკიმ განაცხადა, რომ საქართველოში განვითარებული მოვლენები "ცხადად მოითხოვს სანქციებს" და დაამატა, რომ ამასთან დაკავშირებით ევროკავშირში მოლაპარაკებები უკვე მიმდინარეობს.
"რაც ხდება საქართველოში ბოლო 12 დღის განმავლობაში, სანქციებს ცხადად მოითხოვს და ვიცი, რომ მუშაობა სანქციების მოსამზადებლად უკვე მიმდინარეობს, თუ მივაღწევთ ერთსულოვნებას, ეს დამოკიდებულია 27-ივე დედაქალაქზე. ვფიქრობ, იმედი მაქვს, ევროკავშირის ნებისმიერი დედაქალაქისთვის ძალიან რთული იქნება, უგულებელყოს ძალადობისა და სისასტიკის დონე. ვნახოთ, ორშაბათს მიიღებენ თუ არა სანქციებს, მოსამზადებელი სამუშაოები ნამდვილად მიმდინარეობს". - განაცხადა ჰერჩინსკიმ.
საქართველოში, ქვეყნის მასშტაბით საპროტესტო აქციები მიმდინარეობს - ივანიშვილის რეჟიმმა ევროინტეგრაციის პროცესი ოფიციალურად შეაჩერა.
ევროკავშირს რუსული კანონის მიღების შემდეგ თავად ჰქონდა საქართველოს გაწევრიანების პროცესი შეჩერებული და გაწევრიანების გზაზე დასაბრუნებლად რუსული კანონების გაუქმებას მოითხოვდა.
ივანიშვილის პრემიერმინისტრმა 28 ნოემბერს თქვა, რომ აჩერებს გაწევრიანების პროცესს 2028 წლამდე.
ამ განცხადების შემდეგ პრეზიდენტმა სალომე ზურაბიშვილმა დიპლომატიურ კორპუსთან საგანგებო შეხვედრა დანიშნა.
ამასთან, საქართველოს მთელ ტერიტორიაზე თვითორგანიზებული მოქალაქეების პროტესტის კერები გაჩნდა, დედაქალაქში მოქალაქეთა ნაწილი ქართული ოცნების ოფისთან შეიკრიბა.
ოპოზიცია რეჟიმის გადაწყვეტილებას ღალატად აფასებს.
პრეზიდენტმა სალომე ზურაბიშვილმა დიპლომატიურ კორპუსთან და ოპოზიციის ლიდერებთან შეხვედრის შემდეგ, პოლიციას და ჯარს მიმართა.
შემდგომ, პარლამენტთან საპროტესტო აქციაზე ზურაბიშვილი მივიდა და სპეცრაზმის წარმომადგენლებს მიმართა.
პოლიციამ საპროტესტო აქციის მონაწილეების, მათ შორის, ჟურნალისტების წინააღმდეგ არაპროპორციული ძალა გამოიყენა. სპეცრაზმმა ძალადობრივად დაშალა დემონსტრანტები. დაშავდა არაერთი ადამიანი, მათ შორის, ჟურნალისტები. დააკავეს 43 მომიტინგე.
საპატრიარქომ განცხადება გაავრცელა და მოუწოდა როგორც ხელისუფლებასა და ძალოვანი სტრუქტურების წარმომადგენლებს, ისე მომიტინგეებს, "თავი შეიკავოთ აგრესიული და შეურაცხმყოფელი ქმედებისაგან, ფიზიკური და სიტყვიერი დაპირისპირებისაგან. განსხვავებული აზრისა და შეხედულების გამო ნუ დავაზარალებთ ურთიერთს და შევძლოთ, ჩვენი პოზიცია გაცილებით ცივილური ფორმით გამოვხატოთ".
რუსთაველზე მრავალრიცხოვანი აქცია 29 და 30 ნოემბერსაც გაიმართა. სპეცრაზმმა მომიტინგეები ისევ დაარბია. დემონსტრაციები მიმდინარეობს ახლაც - თბილისსა და საქართველოს სხვა ქალაქებში. პარალელურად, სხვადასხვა სახელმწიფო უწყების თანამშრომლების ნაწილი განცხადებით ემიჯნება ხელისუფლების გადაწყვეტილებას.
ევროკავშირში გაწევრიანების შეჩერების და აქციების დარბევის ფონზე, აშშ-მ საქართველოსთან სტრატეგიული პარტნიორობა შეაჩერა და მიზეზად ქართული ოცნების არადემოკრატიული ნაბიჯები დაასახელა.