შაჰინი სანქციებზე: აშშ ქართველი ხალხის დემოკრატიისკენ მისწრაფებებს მხარს ყოველთვის დაუჭერს

მოხარული ვარ, რომ ბაიდენის ადმინისტრაციამ სანქციები დეზინფორმაციის გავრცელებაზე და სამოქალაქო საზოგადოების წინააღმდეგ ძალადობაზე პასუხისმგებელ 4 და სავიზო შეზღუდვა კიდევ 60 ქართველ პირს დაუწესა. ჭეშმარიტი დემოკრატიისკენ ქართველი ხალხის მისწრაფებებს აშშ მხარს ყოველთვის დაუჭერს.

ასე ეხმაურება თავის X-ზე აშშ-ს სენატორი ჯინ შაჰინი აშშ-ს სახაზინო დეპარტამენტის ახალ სანქციების პაკეტს.

16 სექტემბერს აშშ-ს სახაზინო დეპარტამენტმა "ხარება", იგივე ზვიად ხარაზიშვილი, მისი მოადგილე მილერი ლაგაზაური და პარტია ალტ-ინფოს ლიდერები, კონსტანტინე მორგოშია და ზურაბ მახარაძე დაასანქცირა.

ამასთანავე, აშშ-ს სახელმწიფო დეპარტამენტი სავიზო შეზღუდვებს დაუწესებს 60-ზე მეტ ქართველ პირსა და მათ ოჯახის წევრებს, რომლებიც საქართველოში დემოკრატიისთვის ძირის გამოთხრაში პასუხისმგებლები, ან თანამონაწილეები არიან.