რუსეთის საგარეო საქმეთა სამინისტრომ 31 არტს გამოაქვეყნა განცხადება, რომელშიც უკრაინას კროკუს სითი ჰოლზე მოწყობილ ტერაქტში ოფიციალურად ადანაშაულებენ.
"22 მარტს ქალაქ კრასნოგორსკში ჩადენილი სისხლისმღვრელი ტერაქტი, რომელმაც მთელი მსოფლიო შეძრა, ბოლო პერიოდში არაა პირველი ტერაქტი ჩვენი ქვეყნის წინააღმდეგ. რუსეთის კომპეტენტური ორგანოების მიერ ჩატარებული საგამოძიებო მოქმედებები აჩვენებს, რომ ამ დანაშაულის ყველა კვალი უკრაინამდე მიდის." – წერია განცხადებაში.
განცხადებაში კროკუს სითი ჰოლზე რადიკალი ისლამისტების მიერ მოწყობილ თავდასხმას ადარებენ პროპაგანდისტი ალექსანდრ დუგინის ქალიშვილის, დარია დუგინასა და ომის მხარდამჭერი სამხედრო ბლოგერი ვლადლენ ტატარსკის აფეთქების ფაქტებს, ასევე ყირიმის ხიდზე მიტანილ თავდასხმებს.
რუსეთის საგარეო საქმეთა სამინისტრო უკრაინისგან მოითხოვს, რომ გადაეცეთ უკრაინის უსაფრთხოების სამსახურის (СБУ) მეთაური ვასილი მალიუკი.
"ამასთან დაკავშირებით, რუსეთის საგარეო საქმეთა სამინისტრომ უკრაინის ხელისუფლებას გადასცა მოთხოვნები... მოცემულ ტერაქტთან დაკავშირებული ყველა პირის დაუყოვნებლივ დაკავებასა და გადაცემაზე. ამ მოთხოვნებს შორის არის СБУ-ს მეთაურის, ვ.მალიუკის დაკავებაც." – წერია განცხადებაში.
რუსეთს საკუთარი მტკიცების დასადასტურებლად კვლავ არანაირი მტკიცებულება არ მოუყვანია.
22 მარტის ღამეს რუსეთის დედაქალაქის მახლობლად, მოსკოვის ოლქში, კრასნოგორსკში მდებარე "კროკუს სითი ჰოლის" საკონცერტო დარბაზში, სულ მცირე, სამი შეიარაღებული პირი შეიჭრა. მათ შენობაში მყოფ მოქალაქეებს ცეცხლსასროლი იარაღიდან გაუხსნეს ცეცხლი. რუსულ ტელეგრამ-არხებზე გავრცელდა კადრები, რომლებშიც ჩანს, როგორ ისვრიან საკონცერტო დარბაზში თავდამსხმელები და როგორ იმალება ხალხი. გავრცელებულ ვიდეოებში ჩანან დაღუპული ადამიანებიც.
თავდამსხმელებმა შემთხვევის ადგილიდან მიმალვა შეძლეს, Renault-ის მარკის თეთრი ავტომობილით. ხანძრის შედეგად განადგურდა საკონცერტო დარბაზის ზედა სართულები. ბოლო მონაცემებით, დაღუპულთა რიცხვი 144-ია. ტერაქტში მონაწილე პირები 23 მარტს დააკავეს. რუსულ ტელეგრამ-არხებზე გავრცელდა ვიდეო, რომელშიც ჩანს, რომ ერთ-ერთ ეჭვმიტანილს სპეცსამსახურების თანამშრომელი მოჭრილ ყურს პირში ტენიდა. 24 მარტს კი გავრცელდა ფოტო, რომელშიც კიდევ ერთ თავდამსხმელს აწამებდნენ. ფოტოში ჩანს ფარიდდუნ შამსუთდინი, რომელიც ძირს, შარვალჩახდილი გდია. მას ერთ-ერთ ფეხზე ადგას რუსი ძალოვანი. ფოტოში ჩანს ელექტრომოწყობილობაც, რომლის სადენებიც, სავარაუდოდ, კროკუს სითი ჰოლზე თავდამსხმელის სასქესო ორგანოზეა შეერთებული.
რუსეთის პრეზიდენტი, ვლადიმირ პუტინი მომხდარს პირადად მხოლოდ რამდენიმე საათის შემდეგ გამოეხმაურა. მისი მტკიცებით, გაქცეული ტერორისტები, რომლებიც დააკავეს, უკრაინის საზღვრის მიმართულებით მიდიოდნენ და მეზობელ ქვეყანაში გადასვლას აპირებდნენ. ამას უარყოფს უკრაინა.
თავდასხმაზე პასუხისმგებლობა ე.წ. ისლამურმა სახელმწიფომ (ISIS), კერძოდ ე.წ. ხორასნის ვილაიეთმა აიღო. ტერორისტულ ორგანიზაციასთან დაკავშირებულმა მედიამ გამოაქვეყნა განცხადება, რომელშიც თავდასხმას "ბოლო წლებში ყველაზე დაუნდობელი" უწოდეს და ხაზი გაუსვეს, რომ მათ სამიზნეს ქრისტიანები წარმოადგენდნენ.
7 მარტს აშშ-ს საელჩო რუსეთში საკუთარ მოქალაქეებს პოტენციური თავდასხმის შესახებ აფრთხილებდა. საკუთარ მოქალაქეებს ასევე აფრთხილებდნენ სხვა დასავლური საელჩოებიც.
რუსეთის ცნობით, ტერაქტში მონაწილეობის ბრალდებით, დაკავებულია 11 პირი, აქედან 4 უშუალოდ შემსრულებელია. ტაჯიკეთის ოთხ მოქალაქეს: დალერჯონ მირზოევს, მუროდალი რაჩაბალიზოდას, ფარიდდუნ შამსუთდინსა და მუჰამადსობირ ფაიზოვს მოსკოვის ბასმანის მოსკოვის სასამართლომ პატიმრობა უკვე შეუფარდა. მათ ბრალი სრულად აღიარეს. სასამართლო პროცესზე ოთხივე ეჭვმიტანილს ეტყობოდა ცემის კვალი.
