ისრაელის პრემიერმინისტრი, ბენიამინ ნეთანიაჰუ ჩრდილოეთ ღაზაში ჩავიდა და ისრაელის თავდაცვის ძალების მეთაურებს ესაუბრა. სამხედრო მეთაურებმა მას ჰამასის წინააღმდეგ მოქმედებების ანგარიში ჩააბარეს.
"ორი რამ უნდა გითხრათ: პირველ რიგში, ჩვენ ყველაფერს გავაკეთებთ თქვენს დასაცავად, თქვენი სიცოცხლის დასაცავად. ჩვენ გვსურს ამ მისიის [დასრულება], მაგრამ გვსურს დაგიცვათ მაქსიმალურად". - უთხრა სამხედროებს ნეთანიაჰუმ.
ისრაელის პრემიერმინისტრმა ხაზი გაუსვა, რომ საბრძოლო მოქმედებების შეწყვეტა ჯერჯერობით არ იგეგმება და ომი ჰამასის განადგურებამდე გაგრძელდება.
"მეორე - ჩვენ არ ვაპირებთ გაჩერებას. თუ ვინმე საუბრობს შეჩერებაზე - არა, არ ვჩერდებით. ეს ომი ბოლომდე გაგრძელდება, სანამ მათ ბოლოს არ მოვუღებთ. არაფერი ამაზე ნაკლები". – თქვა მან.
აქამდე ბენიამინ ნეთანიაჰუმ ქნესეთში გამოსვლის დროს თქვა, რომ ისრაელი იღებს "ყველანაირ ძალისხმევას", რომ ჰამასის ტყვეობაში მყოფი მძევლები გაათავისუფლონ. მისი თქმით, ამ ძალისხმევისთვის საჭიროა "სამხედრო ზეწოლა". მან ამ გამოსვლის დროსაც აღნიშნა, რომ საბრძოლო მოქმედებების შეჩერებას არ აპირებენ. ისრაელის პრემიერის თქმით, ის დაუკავშირდა ჩინეთის პრეზიდენტს, სი ძინფინგსა და რუსეთის პრეზიდენტს, ვლადიმირ პუტინს, რათა მძევლების გათავისუფლებაში პირადად ჩაერთონ. მან ასევე აღნიშნა, რომ საკუთარი ცოლი დახმარებას პაპს სთხოვს.
ქნესეთში გამოსვლის პარალელურად, აქვე იყვნენ შეკრებილი ჰამასის მიერ მძევლად აყვანილი ადამიანების ნათესავებიც, რომლებიც პრემიერის სიტყვას უარყოფითი პოზიციების გამომხატველი ხმაურით შეხვდნენ.
