23 ოქტომბერს ამერიკის შეერთებული შტატების საელჩომ ფილიპინებში სახელმწიფო დეპარტამენტის განცხადება გაავრცელა, რომელშიც ნათქვამია, რომ აშშ ჩინეთიდან წამოსული პოტენციური საფრთხეებისგან ფილიპინებს დაიცავს.
აშშ-მ და ფილიპინებმა 1951 წლის 30 აგვისტოს ორმხრივი თავდაცვის ხელშეკრულება გააფორმეს, რის მიხედვითაც, თუკი რომელიმე სხვა სახელმწიფო ერთ-ერთ მათგანს თავს დაესხმება, ორივე მხარე ვალდებულია ერთმანეთს თავდაცვაში დაეხმარონ.
"ჩინეთის სახალხო რესპუბლიკის სანაპირო დაცვისა და საზღვაო ჯარის სახიფათო და უკანონო ქმედებების ფონზე, აშშ ფილიპინელი მოკავშირეების გვერდით დგას", - ნათქვამია გავრცელებულ განცხადებაში.
გუშინ ფილიპინებმა ჩინეთის სანაპირო დაცვა სამხრეთ ჩინეთის ზღვაში ფილიპინურ ხომალდთან მიზანმიმართულად შეჯახებაში დაადანაშაულა. ფილიპინური ხომალდი სპრატლის კუნძულებისკენ მარაგის შევსების მიზნით მიემართებოდა.
