ისრაელის თავდაცვის ძალების (IDF) სპიკერის მიერ X-ზე, ყოფილ Twitter-ზე, გავრცელებულ განცხადებაში ნათქვამია, რომ ისრაელმა ტერორისტული ორგანიზაცია ჰამასის ფინანსური საკითხების ზედამხედველი მოკლა.
დანიელ ჰაგარის თქმით, 10 ოქტომბერს IDF-ის ავიაციის იერიშის შედეგად ჯავად აბუ შამალა მოკლეს. იგი ჰამასის ეკონომიკის საკითხებს განაგებდა და ღაზის სექტორსა და მის გარეთ ტერორისტული საქმიანობისთვის ფინანსების გამოყოფას უზრუნველყოფდა.
მას ტერორისტულ ორგანიზაციაში უსაფრთხოების საკითხებთან დაკავშირებულ პოზიციაზე ყოფნის ისტორიაც აქვს.
ჰაგარის თქმით, ჯავად აბუ შამალა ისრაელის სახელმწიფოში მოქალაქეებისთვის ზიანის მიყენებას ემსახურებოდა.
ღაზის სექტორიდან ჰამასის ისრაელზე მოულოდნელი თავდასხმა 7 ოქტომბერს, ადგილობრივი დროით დილის 7 საათზე დაიწყო, როცა ისრაელის მიმართულებით ტერორისტებმა ასობით რაკეტა ისროლეს, პარალელურად კი სამხრეთით მდებარე ქალაქებში შეიჭრნენ.
თავდასხმა ერთდროულად ხმელეთიდან, ზღვიდან და ჰაერიდან განხორციელდა. ისრაელისთვის ეს სრულიად მოულოდნელი აღმოჩნდა.
თავდასხმის თარიღამდე ერთი დღით ადრე შესრულდა იომ კიპურის ომის (ეგვიპტისა და სირიის ისრაელზე თავდასხმის) 50 წლისთავი - ექსპერტების ნაწილი მიიჩნევს, რომ ეს შემთხვევითობა არ არის.
ჰამასის ტერორისტებმა დახოცეს ისრაელის ასობით მოქალაქე, მათ შორის, ქალები, ბავშვები და მოხუცები.
ტყვედ აიყვანეს ისრაელის ჯარისკაცები და სამოქალაქო პირები. ტერორისტები ტყვეებს, მათ შორის, ბავშვებს არაადამიანურად ეპყრობიან. მათი ნაწილი ღაზის სექტორში ბრბოს თვალწინ, აღლუმით ჩამოატარეს და ვიდეოები გაავრცელეს.
საპასუხოდ ისრაელმა ჰამასის წინააღმდეგ ანტიტერორისტული ოპერაცია "რკინის ხმლების" დაწყება გამოაცხადა და ტერიტორიების გათავისუფლებასთან ერთად ღაზის სექტორზე სარაკეტო იერიშების მიტანა დაიწყო.
8 ოქტომბერს ისრაელმა საომარი მდგომარეობა ოფიციალურად გამოაცხადა. პრემიერმინისტრი ნეთანიაჰუ ამბობს, რომ ჰამასი "ძლევამოსილი შურისგებისთვის" უნდა მოემზადოს. ღაზის სექტორში მცხოვრებლებს ისრაელი ტერიტორიის დატოვებისკენ მოუწოდებს.
