ე.წ. მთიანი ყარაბაღის რესპუბლიკის ომბუდსმენის, გეგამ სტეპანიანის ცნობით, აზერბაიჯანის თავდასხმებს ყარაბაღში ემსხვერპლა 2 სამოქალაქო პირი.
ასევე, ომბუდსმენის ცნობით, დაშავდა 23 ადამიანი, საიდანაც 8 არასრულწლოვანია.
19 სექტემბერს აზერბაიჯანულმა თავდაცვის ძალებმა "ანტიტერორისტული ოპერაცია" დაიწყეს.
აქამდე ბაქო სეპარატისტული არცახის შეიარაღებულ ფორმირებებს ადანაშაულებდა გზების დანაღმვაში, რასაც 6 ადამიანი ემსხვერპლა. როგორც აზერბაიჯანის ეროვნული უსაფრთხოების სამსახურში ირწმუნებოდნენ, ფორმირებები აზერბაიჯანის ტერიტორიაზე შეიპარნენ და ახმედბეილი-ფიზული-შუშას საავტომობილო გზის 58-ე კილომეტრზე განათავსეს ნაღმი, რომლის აფეთქების შედეგად 19 სექტემბერს, 03:45-ზე ორი სამოქალაქო პირი დაიღუპა. ამას გარდა, ბაქომ გაავრცელა ცნობა, რომ ასევე ნაღმის აფეთქების შედეგად დაიღუპა ოთხი აზერბაიჯანელი პოლიციელი, რომლებიც "ტერორიზმის ადგილისკენ" მიდიოდნენ.
სეპარატისტები ამ ცნობას დეზინფორმაციას უწოდებდნენ.
