კობახიძე გახარიაზე: საეჭვო სპეცოპერაციები იყო პანკისში, 20 ივნისს – შეიძლება, უკან ენმ იდგეს

ის, რომ ალიანსი არსებობს ნაცმოძრაობასა და გახარიას შორის, ამაზე კითხვის ნიშნები მთლიანად მოხსნილია. არის დეტალები, რომლებიც უკავშირდება ამ ალიანსს, კავშირებს, რომლებიც წარმოიშვა ჯერ კიდევ ბევრად ადრე, ვიდრე გახარია გავიდოდა ჩვენი პოლიტიკური გუნდიდან. ძალიან ბევრი დეტალი, ნიუანსი შეიძლება იყოს საინტერესო საზოგადოებისთვის, თანამშრომლობის დეტალებზე გვაქვს საუბარი. შეიძლება, ეს იყოს დაფინანსებასთან დაკავშირებული საკითხები, შეიძლება, იყოს ქმედებები, რომლებიც ნაკარნახევი იყო ამ ალიანსით და ასე შემდეგ. მაგალითად, გახსოვთ, რომ იყო ძალიან საეჭვოდ ჩატარებული სპეცოპერაციები, იგივე პანკისში, იგივე 20 ივნისს და ასე შემდეგ. შეიძლება, ამის უკანაც იდეგს ნაცმოძრაობის კვალი. წინასწარ ვერ გეტყვით, მაგრამ ამის დრო მალე დადგება.