2021 წლის ადგილობრივი თვითმმართველობის არჩევნების II ტურამდე ორი კვირით ადრე დედაქალაქის ქუჩებში ახალი სარეკლამო ბანერები გამოჩნდა, რომელზეც ერთიანი ნაციონალური მოძრაობის მერობის კანდიდატის, ნიკა მელიას წინასაარჩევნო დაპირებაა გამოსახული – "უფასო კვება თბილისის საჯარო სკოლებში".
ტაბულას ენმ-ში განუმარტეს, რომ გეგმა დედაქალაქის საჯარო სკოლების აბსოლუტურად ყველა მოსწავლეზეა გათვლილი, მიუხედავად მათი სასკოლო ასაკის, სოციალური სტატუსისა და ეკონომიკური მდგომარეობისა.
ერთიანი ნაციონალური მოძრაობის გეგმის თანახმად, თბილისში რეგისტრირებული 190 000 – 200 000 მოსწავლის გამოკვება სახელმწიფოს, სავარაუდოდ, ყოველწლიურად არაუმეტეს 90-100 მილიონი ლარი დაუჯდება.
ბიუჯეტისა და მოსწავლეთა რაოდენობის გათვალისწინებით, თითოეული მოსწავლის გამოკვებაზე ყოველდღიურად, დაახლოებით, 2.5-3 ლარი დაიხარჯება.
აღსანიშნავია, რომ კვებითი რაციონის, რესურსების განაწილებისა და მენეჯმენტის შესახებ კონკრეტული გეგმა და ბიუჯეტის პროექტი ჯერაც არ არის გასაჯაროებული, რასთან დაკავშირებით ენმ-ში განგვიმარტავენ, რომ გეგმა საჯარო მას შემდეგ გახდება, რაც ნიკა მელიას თბილისის მერად აირჩევენ.
