სასამართლოს გადაწყვეტილებით, 28 წლის ვიეტნამელ ლე ვან ტრის 5 წლით პატიმრობა მიესაჯა. მას ბრალად ედება კარანტინის წესების დარღვევა და COVID-19-ის გავრცელება.
BBC-ის ინფორმაციით, მოსამართლემ ვან ტრი 8 ადამიანის "საშიში დაავადებით ინფიცირებაში" დამნაშავედ ცნო, რომელთაგან ერთი გარდაიცვალა.
სასამართლოს განმარტებით, ივლისის დასაწყისში ვან ტრიმ კა-მაუს პროვინციაში ჯანმრთელობის ანკეტის შევსებისას ქალაქ ხოშიმინში მოგზაურობის ფაქტი დამალა.
ხოშიმინში ქვეყნის მასშტაბით ერთ-ერთი ყველაზე მაღალი ინფიცირების მაჩვენებელია და იქ მოგზაურობის შემდეგ, მოქალაქეები ვალდებული არიან, დაიცვან 21-დღიანი იზოლაციის წესი.
ვან ტრიმ იზოლაციის წესიც დაარღვია და ოჯახის წევრებთან ერთად, თანამშრომლებიც დააინფიცირა.
ვიეტნამის სასამართლომ მის საქმეზე განაჩენი ერთ დღეში გამოიტანა და პატიმრობის გარდა, ვან ტრის 880-დოლარიანი ჯარიმაც შეუფარდა.
აღსანიშნავია, რომ 2021 წლის ივლისამდე ინფიცირებულთა საერთო რაოდენობა ვიეტნამში უჩვეულოდ დაბალი იყო, თუმცა ივლისის შემდეგ, შემთხვევების რაოდენობა 537 000-მდე გაიზარდა, დაღუპულთა რაოდენობა კი 14 000-ს აღწევს.
