გერმანიაში მცხოვრებმა ქართველებმა ბერლინში საპროტესტო მსვლელობა მოაწყვეს. მსვლელობა საქართველოს საელჩოდან, ბრანდენბურგის ჭიშკრამდე, გერმანიაში ევროკავშირის წარმომადგენლობამდე გაიმართა. აქციის ორგანიზატორები უერთდებიან თბილისში მიმდინარე პროტესტს და ლექსო ლაშქარავას გარდაცვალებასა და ჟურნალისტებზე ძალადობაზე პასუხისმგებელი პირების დასჯას ითხოვენ.
"Georgian Movement in Germany აგრძელებს აქციებს ბერლინში. ჩვენ ვუერთდებით და ვიზიარებთ თბილისში მიმდინარე აქციების სულისკვეთებას და მოთხოვნებს.
დაისაჯონ ლექსოს მკვლელობასა და ჟურნალისტებზე ძალადობაზე პასუხისმგებელი პირები!
გადადგეს და დაისაჯოს ძალადობის წამხალისებელი ირაკლი ღარიბაშვილი!
გაუქმდეს საპატრიაქოსთან დადებული კონკორდატი და ეკლესიას შეუწყდეს სახელმწიფო დაფინანსება!
საქართველოს მოსახლეობის აბსოლუტური უმრავლესობა მხარს უჭერს ევროსტრუქტურებში ქვეყნის ინტეგრაციას და საქართველოს ევროკავშირთან აკავშირებს ასოცირების ხელშეკრულება.
აქედან გამომდინარე, მოვუწოდებთ ევროკავშირს რეაგირების გარეშე არ დატოვოს საქართველოს მთავრობის გამიზნული სვლა დიქტატურისკენ!
მკაცრი პასუხი გასცეს საქართველოში მთავრობის მხრიდან ადამიანის ფუნდამენტური უფლებების დარღვევას!
მხარი დაუჭიროს ქართველი ხალხის ისტორიულ არჩევანს, გახდეს ევროპული ოჯახის სრულუფლებიანი წევრი.
მოგიწოდებთ ყველას, ვისაც გული შეგტკივათ საქართველოზე, ადამიანის უფლებებსა და თავისუფლებაზე, შემოგვიერთდეთ კვირას, 18 ივლისს საქართველოს საელჩოსთან და ერთად გავაპროტესტოთ ძალადობა, დისკრიმინაცია და უთანასწორობა!" - წერენ აქციის ორგანიზატორები.
TV პირველის ოპერატორი, ლექსო ლაშქარავა, რომელიც 5 ივლისს ორკებმა სასტიკად სცემეს, 11 ივლისს, დედამ გარდაცვლილი იპოვა. ლაშქარავას ექსპერტიზა უტარდება. შსს-მ გამოძიება 115-ე მუხლით დაიწყო, რაც თვითმკვლელობამდე მიყვანას გულისხმობს. უწყება ამტკიცებს, რომ ლაშქარავას გვამიდან აღებულ ნიმუშებში ნარკოტიკი აღმოჩნდა და, შესაძლოა, ყოფილიყო ზედოზირება.
- აშშ-ს ყოფილი ელჩები: ზედოზირების ბრალდებას ავტოკრატიული მთავრობები იყენებენ
- კალოიანი ლაშქარავაზე: ადრეულ ეტაპზე ამ ინფორმაციით პროფესიულ მსჯელობაში შესვლა სპეკულაციაა
- "ნახევარ დღეში 3-ჯერ ზედოზირების ვერსია სამედიცინო აბსურდია" – გეგეჭკორი ლაშქარავაზე
TV პირველის გადამღებ ჯგუფზე ძალადობის ფაქტზე შინაგან საქმეთა სამინისტროს ხუთი ორკი ჰყავს დაკავებული. ჟურნალისტ მირანდა ბაღათურიას თქმით, მათ ოცამდე მოძალადე სცემდა.