12 ივნისს კრწანისის ქუჩაზე მომხდარი ავტოავარიის შედეგად დაშავებული კიდევ 1, მე-3 ადამიანი გარდაიცვალა. ინფორმაცია ნიუ ჰოსპიტალის ექიმმა, ვახტანგ კალოიანმა დაადასტურა. მისივე თქმით, კლინიკაში მკურნალობას 2 პაციენტი აგრძელებს.
"კლინიკაში მკურნალობას აგრძელებს კიდევ 2 პაციენტი. მათი მდგომარეობა დამაკმაყოფილებელია, ჩაუტარდათ ქირურგიული და ტრავმატოლოგიური ჩარევა. სამწუხაროდ, გარდაიცვალა 49 წლის 1 პაციენტი, რომელსაც ჰქონდა სიცოცხლესთან შეუთავსებელი დაზიანება". – თქვა ექიმმა.
კრწანისის ქუჩაზე ავტოსაგზაო შემთხვევის შედეგად შემთხვევის ადგილზე ერთი ადამიანი დაიღუპა და რამდენიმე დაშავდა. 12 ივნისს კლინიკაში გადაყვანის შემდეგ გარდაიცვალა კიდევ ერთი დაშავებული. გავრცელებული ინფორმაციით, სატვირთო ავტომობილი კლინიკა ნიუ ჰოსპიტალთან გზის საპირისპირო მხარეს გადავიდა და რამდენიმე მსუბუქ ავტომობილს შეეჯახა.
შინაგან საქმეთა სამინისტროს ინფორმაციით, მომხდარზე გამოძიება სსკ-ის 276-ე მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.