დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, ჯანმო-ში [WHO] დღეს, 7 მაისს, ტექნიკური ჯგუფის შეხვედრაა, სადაც ერთ-ერთ საკითხად სინოფარმის ავტორიზაციის საკითხი განიხილება.
"როგორც მე მაქვს ოფიციალური და არაოფიციალური ინფორმაცია, დღეს არის ჯანმოში ტექნიკური ჯგუფის შეხვედრა, სადაც მრავალი საკითხი განიხილება, მათ შორის ეს საკითხი [სინოფარმის ავტორიზაცია]. დამატებითი ინფორმაცია სჭირდებოდა ტექნიკურ ჯგუფს. როგორც ვიცი, ჩინურმა მხარემ წარადგინა დამატებით და დღეს უნდა იყოს განხილვა, დაველოდოთ". – ამბობს ამირან გამყრელიძე.
ჩინური წარმოების ვაქცინის, სინოფარმის 100 000 დოზა საქართველოში აპრილის დასაწყისში შემოვიდა, თუმცა, იმ პირობით, რომ აპრილის ბოლომდე ავტორიზაციას გაივლიდა და მხოლოდ ამის შემდეგ დაიწყებოდა სინოფარმით აცრები.
ამის მიუხედავად, ვაქცინაციის საბჭომ მიიღო გადაწყვეტილება, აღდგომის დღესასწაულების შემდეგ, 4 მაისს სინოფარმის ვაქცინა ჩაერთო ვაქცინაციის პროცესში. ჯანდაცვის მინისტრის მოადგილის განმარტებით, ამის მიზეზი 55 წლამდე ასაკის მოსახლეობაში ასტრაზენეკას ვაქცინის შეზღუდვა და რთული ეპიდვითარებაა. საქართველოს მთავრობას სინოფარმთან მოლაპარაკებები კიდევ ნახევარი მილიონი დოზა ვაქცინის მოწოდებაზე აქვს.
WHO-ს მიერ გამოქვეყნებულ მასალებში სინოფარმის ეფექტიანობა 78.1%-ით განისაზღვრა, რაც მრავალ ქვეყანაში ჩატარებული მე-3 ფაზის კვლევის შედეგებით დადგინდა. კვლევაში სულ 16,125 ადამიანი მონაწილეობდა.
