ბელარუსში ალექსანდრ ლუკაშენკოს გადადგომის მოთხოვნით აქციები გრძელდება.
13 დეკემბერს ბელარუსში პოლიციამ ანტისამთავრობო აქციაზე დაახლოებით 70 მომიტინგე დააკავა. ამის შესახებ ინფორმაციას ბელარუსული უფლებადამცველთა ორგანიზაცია Viasna-96 ავრცელებს.
ადგილობრივი ახალი ამბების სააგენტოს Nasha Niva-ს ინფორმაციით, კვირას ბელარუსის სხვადასხვა ქალაქებში ასზე მეტი მსვლელობა გაიმართა, მათ შორის, მინსკშიც. თითოეულ მსვლელობაში რამდენიმე ათეული ან რამდენიმე ასეული ადამიანი იღებდა მონაწილეობას. მსვლელობების ნაწილი ქალაქების უბნებშიც გაიმართა.
მომიტინგეების ნაწილს ხელში ეჭირა ბელარუსის ისტორიული თეთრი-წითელი-თეთრი დროშა. "დიდხანს სიცოცხლე ბელარუსს!" - გაიძახდნენ ისინი.
ბელარუსის ოპოზიციის ლიდერების ინფორმაციით, მას შემდეგ, რაც აგვისტოში ბელარუსში აქციები დაიწყო, 30 000-ზე მეტი ადამიანი დააკავეს.
საპროტესტო აქციები ბელარუსში სამი თვეა, გრძელდება. დემონსტრაციები 9 აგვისტოს ჩატარებული საპრეზიდენტო არჩევნების შემდეგ დაიწყო. მოსახლეობა არჩევნების შედეგებს აპროტესტებს. არჩევნების შედეგების თანახმად, ალექსანდრ ლუკაშენკო მეექვსე ვადით გახდა ბელარუსის პრეზიდენტი. მან ხმების 80%-ზე მეტი მოაგროვა. ბელარუსის ცეესკოს მონაცემების თანახმად, სვეტლანა ტიხანოვსკაიამ ხმების 10% დააგროვა. ოპოზიცია არჩევნების შედეგებს არ ცნობს და ხელახალი არჩევნების ჩატარებას მოითხოვს.